भांगरभूंय | प्रतिनिधी
म्हापशें: कोलवाळच्या मध्यवर्ती बंदखणी लागसार पुलिसांनी छापो घालून साडेपांच लाखांचो ५.४०० किलो गांजो जप्त केलो. हे विशीं दुबावीत आरोपी गोविंद रामेश्वरकुमार रंगी (१९, रा. मूळ बिलासपूर राजस्थान) हाका अटक केली.
ही कारवाय पुलिसांनी आयज बिरेस्तारा दनपरां सुमार ११.४० ते २ मजगतीं केली. कोलवाळ बंदखण लागसार राष्ट्रीय महामार्गार ड्रग्जाचो विक्री वेव्हार जातलो अशी म्हायती पुलिसांक मेळ्ळी.
ते प्रमाण पुलिसांनी सांपळो रचलो. दुबावीत आरोपी प्रवासी बसींतल्यान घडणुके सुवातेर देंवतांच पुलिसांनी ताका धरून ताब्यांत घेतलो. ताची तपासणी करतना ताचे कडेन ५ किलो ४०० ग्रॅम वजनाचो गांजो सांपडलो. ह्या गांज्याची किंमत ५ लाख ५० हजार रूपया आसा. पुलिसांनी हो गांजो जप्त केलो आनी दुबाविता आड ड्रग्ज प्रतिबंधक कायद्या खाला गुन्यांव नोंद करून ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
