भांगरभूंय | प्रतिनिधी
पणजीः गोंय राज्य महिला आयोग, राष्ट्रीय महिला आयोग आनी कोलवाळे केंद्रीय
बंदखण अधिक्षक कार्यालयान बंदखणींतल्या बायलां कैदी आनी बायलां कर्मचाऱ्यां खातीर
भलायकी शिबीर घडोवन हाडले. कोलवाळ मुळावे भलायकी केंद्रान हे भलायकी
शिबिरा वेळार तपासणी केली.
ह्या वेळार 7वे पोशण माह निमतान कैद्यां खातीर रांदपाची सर्त आनी ‘एक पेड मॉ
के नाम’ ही वृक्षारोपण कार्यावळ घडोवन हाडली. बंदखण महानिरक्षिक ओम वीर
सिंग बिश्नोई हे मुखेल सोयरे म्हण हजर आशिल्ले. तशेंच गोंय राज्य महिला आयोगाची
अध्यक्ष रंजीता पै, अधिक्षक शंकर गांवकार आनी हेर मानेस्त हजर आशिल्ले.
कार्यावळींत कैद्यांक संबोधित करतना आयजीपी बिश्नोई हांणी सांगलें, फुडाराक मुक्त जावचे खातीर दिल्ले वेवसायीक प्रशिक्षणांतल्यान शिकवण घेवची आनी संवसारात खंयसर परतून बंदखणींत वच्चे नात असो सोपूत तांणी स्वताक दिवचो.
जेन्ना नर्सरीचें उक्तावण आपणें केल्ले तेन्ना थंयची सोबीत फुलां आमचे खुशालकायेचे प्रतनिधीत्व करतात आनी जेन्ना कैद्यांच्या भुरग्यां खातीर बांदिल्ले कुडीचें उक्तावण केले तेन्ना थंयसर केल्ले आकर्शक पेंन्टींग पळोवन आमका कैद्या मदले कुशळ कलाकार दिसून आयले, अशे बिश्नोई हांणी
सांगलें.
महिला आयोगाची अध्यक्ष रंजीता पै हांणी आयोगाच्या कामकाजा विशीं म्हायती दिली. राष्ट्रीय महिला आयोगा कडल्यान प्रेरणा घेवन आमी कागाळी सोडवपा सयत शाश्वत उदरगत धेय्य साध्य करपा खातीर काम करतले, अशें पै हांणी सांगलें.
बंदखणींतल्या कैद्यांक पुश्टीक आहार महिला आयोगा वतीन दिलो जाल्यार डॉ. श्रध्दा हांणी एनेमीया आनी पोशणाचेर मार्गदर्शन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.