भांगरभूंय | प्रतिनिधी
नेण्ट्या भुरग्या सयत चार जाणांक अटक
1.40 लाखांचो 1.397 कील गांजो जप्त
सीसीटीव्ही फुटेजींतल्यान ड्रग्स तस्करी उजवाडाक
भांगरभूंय । प्रतिनिधी
म्हापशें : कोलवाळ बंदखणींत घुंवळे वखदां तस्करी प्रकरणांत कोलवाळ पुलिसांनी एका 16 वर्सांच्या भुरग्या सयत चार जाणांक अटक केली. प्लास्टिकांत गांजो गुंठलायिल्ले बॉल (गुळे) बंदखणींतल्या कैद्यां मेरेन ड्रग्स पावोवपाची ही नवी युक्त आपणायल्ली. सात बॉलांनी आशिल्लो हो सुमार 1.40 लाखांचो 1.397 कील गांजो पुलिसांनी जप्त केला. सीसीटीव्ही फुटेज आनी तंत्रज्ञानाच्या माध्यमांतल्यान पुलिसांनी ही ड्रग्स तस्करी उजवाडायक हाडली.
अटक केल्ल्या दुबावितां मदीं गौमत राजेंद्र तलवार (24, अन्साभाट – म्हापशें), सॅम्युअल प्रेमकुमार पुजारी (24, अन्साभाट – म्हापशें) आनी जाफर नूर अहमद मुल्ला (24, गंगानगर खोर्ली, म्हापशें) हांचो आस्पाव आसा. 16 वर्सां पिरायेच्या दुबाविताक बाल न्याय मंडळान ताच्या पालकांचे सुवादीन केला. बिरेस्तारा 26 जूनाक ताका मेरशेच्या बाल न्याय मंडळा मुखार हाजीर करपाची सुचोवणी केल्या. वयल्या तिनूय दुबावितांक म्हापशें न्यायालयान पांच दिसांची पुलीस कोठडी फर्मायल्या. गुन्यांवा खातीर वापरिल्ली एक दुचाकी लेगीत जप्त केल्या.
ही ड्रग्स तस्करीची घडणूक 14 जूनाक रातच्या 10.15 वरांच्या सुमाराक उजवाडाक आयिल्ली. ते उपरांत 15 जूनाक सकाळीं बंदखणीचे उपअधिक्षक महेश फडते हांणी कोलवाळ पुलिसांक हाची म्हायती दिली. बंदखणीच्या राखणे वणटी भितर कितें तरीं पडलां अशें वॉच – टॉवर नं. 3 चेर ड्युव्टेर आशिल्ले आयआरबी पुलीस कॉन्स्टेबल प्रशांत नायक हांचे नदरेक पडलें. तांणी बंदखण सुरक्षा यंत्रणेक सतर्क केले. घडणुकेचे सुवातेर पळोवणे वेळार सात प्लास्टिकांत गुंठलायिल्ले बॉल सांपडले. तपासणेंत ह्या बॉलांनी गांजो आशिल्ल्याचें स्पश्ट जालें. हे गुळे बंदखणीचे फाटले वटेन आशिल्ले कोलवाळ गृहनिर्माण वसणुकेंतल्यान उडयल्ले.
दुसऱ्या दिसा हे ड्रग्स तस्करीची म्हायती पुलिसांक घडणुकेची म्हायती दिली. ते प्रमाण कोलवाळ पुलिसांनी अज्ञाता आड घुंवळी वखदां प्रतिबंधक कायद्या खाला थेट गुन्यांव दाखल केलो आनी तपासकाम सुरू केलें. हें गांजाचे बॉल उडयल्ल्या वाठाराची पुलिसांनी पळोवणी केली. थंयचे सीसीटीव्ही कॅमेऱ्यांत दुबावीत दोन मोटरसायकलीं वयल्यान आयिल्ल्याचें दिसलें. घडणुकेची सुवात ते म्हापशें आनी कोलवाळ मेरेनच्या सुमार 20 सीसीटीव्ही कॅमेऱ्यांची पुलिसांनी पडटाळणी केली. ते उपरांत मंगळारा 24 जूनाक राती वेळार चारूय दुबावितांक धरून ताब्यांत घेतले आनी हे तस्करीचो सोद लायलो. पुलिसांनी निरिक्षक संजीत कांदोळकार हांच्या मार्गदर्शना खाला उपनिरिक्षक रोहन मडगांवकार, दत्तराज राणे, हवालदार रामा नायक, गुरू मांद्रेंकार, कॉन्स्टेबल प्रवीण पाटील, संदीप मळीक, मंदार कांबळी, निखील नायक, विशाल चोडणकार, प्रसाद रेवोडकार, सर्वेश कळंगुटकार आनी समीर नायक ह्या पंगडान ही कामगिरी केली. फुडलो तपास पुलीस अधिक्षक राहूल गुप्ता आनी उपअधिक्षक विल्सन डिसोझा हांच्या मार्गदर्शना खाला चालू आसा.
गांजो बॉलांक आयली वाऱ्याची आडखळ
चारूय दुबावीत दुचाकीं वयल्यान आयले. बंदखणीच्या दोन मुख्य राखणे वण्टींचे आदीं आशिल्ले दोन मिटर उंचायेचे वण्टीचेर ते चडले आनी तंयच्यान तांणी भितर ही गांजा बॉल शेंवटिले. घडणुके दिसा घोग्यांनी पावस पडटालो, तशेंच वादळी वारो मारतालो. हे खातीर ते बॉल बंदखणींत भितर पडनासतना दोन राखणे वण्टीचे मदीं पडले आनी ही ड्रग्स तस्करी उजवाडाक आयली.
म्हापशेंच्या कैद्यांचेर तस्करीचो दुबाव
आदले बंदखण म्हानिरिक्षक ओमवीरसिंग बिश्नोई हांच्या खर धोरणाक लागून बंदखणींतल्या प्रतिबंधीत वस्तूंचे तस्करीच्या प्रकारांक कांय काळ आळाबंद आयिल्लो. बिश्नोई हांची गोंयांतल्यान बदली जायत रावन कैद्यां कडल्यान प्रतिबंधीत, चड करून ड्रग्स आनी मोबायल फोन मेळोवपाचे खूब तरेचे यत्न चालू आसात. प्लास्टिकांत गांजो गुंठलावन बॉल करप आनी ते बंदखणींत शेंवटून उडोवप अशी युक्त दुबावितांनी काडिल्ली. हे दरेकी 200 ग्राम वजनांचे बॉल आशिल्ले. एका खून प्रकरणांत अटक जाल्ले म्हापशेंचे कांय तरणाटे बंदखणींत आसात. तांणी दुबावितां वरवीं ही ड्रग्स चलयल्ली आसूं येता, असो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
