भांगरभूंय | प्रतिनिधी
म्हापशें: बिनानी कोलवाले राष्ट्रीय म्हामार्गाचेर लिफ्ट मागपाच्या निमतान मोटार चोरपी हसीम ए. एम. (22, रा. अंबतला, केरळ) हाका अटक केली. तशेंच मुरुडेश्वर (कर्नाटक) सावन चोरिल्ली मोटार जप्त केली.
चोरयेची घडणूक 31 मेक मध्यानरातीर 12.30 वरांच्या सुमाराक घडिल्ली. फिर्यादी टॅक्सी चालक फयाझ अहमद मुल्ला (65, कुर्टी फोंडें) जीए 05 टी 5490 नंबराची पर्यटक टॅक्सी मोटारीन पणजेच्यान मोपा विमानतळाचेर प्रवाशांक घेवन गेल्ले. तांकां थंय पावोवन मुल्ला परत येताले. तेन्ना वाटेर बिनानी कोलवाळे म्हामार्गार तीन दुबावितांनी मोटारीक हात दाखोवन लिफ्ट मागली. फिर्यादीन मोटार थारयतकच तिगूय दुबावीत मोटारींत बसले. तांणी आपली बॅग भायरूच दवरली आनी ती डिकींत घालपाक फिर्यादीक सांगलें. फिर्यादी मोटारींतल्यान सकयल देंवताच दुबावीत मोटर घेवन पळून गेल्ले.
ह्या प्रकरणांच चवकशे उपरांत चोरयेंतल्या वयलो दुबावीत केरळांतलो आशिल्ल्याची म्हायती कोलवाळ पुलिशेक मेळ्ळी. ते प्रमाण पुलीस पंगड केरळाक गेलो आनी तांणी दुबाविताक ताब्यांत घेतलो. दुबावितान गुन्यांव कबूल करून चोरिल्ली मोटार मुरुडेश्वरांत दवरिल्ल्याचें पुलिशेक सांगलें. पुलिसांनी झिलींत लिपोवन दवरिल्ली मोटार जप्त केली आनी दुबाविताक रितसर अटक केली.
मोटार चोरी प्रकरणांतले दोग दुबावीत फरार आसात. पुलीस तांचो सोद घेतात. ही कामगिरी पुलीस निरिक्षक सोमनाथ माजीक हांच्या मार्गदर्शना खाला उपनिरिक्षक कुणाल नायक, हवालदार रुपेश कोरगांवकार, सुधीर परब आनी कॉन्स्टेबल सुलेश नायक ह्या पंगडान केली. ह्या प्रकरणांतलो फुडलो तपास पुलीस करतात.
पोळेंचो सीसीटीव्ही कॅमेरा बंद पडिल्लो
मोटार चोरले उपरांत दुबावीत थेट मुरुडेश्वराक वचपाक गेले. पोळें- काणकोण तपासणी नाक्या वयलो सीसीटीव्ही कॅमेरा बंद आशिल्ल्यान त्या दिसा हे मोटारीचो सोद लागूंक नाशिल्लो. मुरुडेश्वर पावताच मोटारींतलें पॅट्रॉल सोंपिल्ल्यान म्हामार्गा कुशीक दुबावितांनी मोटार लिपयली आनी तिगूय दुबावीत केरळ गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
