भांगरभूंय | प्रतिनिधी
पावसाची आडखळीक लागून उसरा सुरू जाल्ले इंडीयन प्रिमीयर लिगेचे (आयपीएल) 60वे मॅचींत येजमान कोलकाता नायट रायडर्सान मुंबय इंडियन्सा आड 16 ओव्हरींनी 7 बाद 157 धांवड्यो करून समाधानकारक धांवसंख्या उबारपाक येस मेळयलें. पावसाक लागून मॅच दरेकी 16 ओव्हरींची केली.
जसप्रीत बुमरा आनी नुवान तुषारा हांणी पयल्या दोन ओव्हरींनी मुंबय इंडियन्साक येस मेळोवन दिलें. पूण, वेंकटेश अय्यर, नितीश राणा, आनी आंद्रे रसेल हांणी आक्रमक बॅटींग केली.
मजगतीं, मुंबय इंडियन्सान टॉस जिखून पयलीं फिल्डींग करपाचो निर्णय घेतलो. नुवान तुषारान पयलेच ओव्हरींत फिल सॉल्टाक (6) बाद केलो. सॉल्टान पयल्याच बॉलाचेर सको मारिल्लो. पूण, तुषारान ताका पांचव्या बॉलाचेर चकयलो. जसप्रीत बुमरान ताच्या पयल्याच बॉलाचेर सुनील नरेनाक बोल्ड केलो. बुमराचो बॉल सुनीलाक कळ्ळोच ना.
अंशुल कंबोजचे पयले ओव्हरींत 10 धांवड्यो आयिल्ल्यान कोलकाता वयलें चेपण कांय प्रमाणांत उणें जालें. पूण, अंशुलान आपले फुडले ओव्हरींत मुखेल श्रेयस अय्यराक (7) बोल्ड करून कोलकाता 40 धांवड्यांचेर तिसरो धपको दिलो.
नितीश राणा अंदूंच्या हंगामांतली दुसरी मॅच खेळपाक मैदानांत देंवलो. दुखापतीक लागून ताका साबार मॅची चुकिल्ल्यो.
कोलकातान पावर प्लेंत 3 विकेटी व्हगडावन 45 धांवड्यो केल्यो. आठवे ओव्हरींत पियुष चावलान मुंबय इंडियन्साक चवथें येस मेळोवन दिलें. ताणें वेंकटेशाक बाद केलो. वेंकटेशान 21 बॉलांनी स चवके आनी दोन सक्यांचे मजतीन 42 धांवड्यो केल्यो.
12वे ओव्हरींत नितीश धांवबाद जालो. बाद जावचे पयलीं ताणें 23 बॉलांनी चार चवके आनी एका सक्याचे मजतीन 33 धांवड्यो केल्ल्यो. तिलक वर्माच्या अचूक थ्रोचेर तो बाद जालो. पियुषान फुडले ओव्हरींत आंद्रे रसेलाक (23) बाद केलो. 12 बॉलांनी 20 धांवड्यो करपी रिंकू सिंगाक निमाणे ओव्हरींत बुमरान तंबूंत धाडलो. रमणदीपान अखेरच्या बॉलाचेर सको मारून कोलकाताक 7 बाद 157 धांवड्यां मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
