कोलकाता नायट रायडर्स फायनलींत

भांगरभूंय | प्रतिनिधी

कोलकाता नायट रायडर्सान क्वॉलिफायर एक मॅचींत सनरायझर्स हैदराबादाक 8 विकेटींनी हारोवन इंडीयन प्रिमीयर लिगेचे (आयपीएल) फायनलींत सुवात मेळयली. नरेंद्र मोदी स्टेडियमाचेर जाल्ले मॅचींत हैदराबादान 19.3 ओव्हरींनी सगल्यो विकेटी व्हगडावन 159 धांवड्यो केल्यो, ताचो फाटलाव करतना कोलकाता नायट रायडर्सान 13.4 ओव्हरींनी 2 विकेटी व्हगडावन 164 धांवड्यो करून जैत जोडलें.

मुखेली श्रेयस अय्यरान नाबाद नाबाद 58 आनी वेंकटेश अय्यरान नाबाद 51 धांवड्यांचें योगदान दिलें. मोखीचो फाटलाव करपी कोलकाताक रहमानउल्लाह गुरबाज आनी सुनील नरेन हे जोडयेन पयले विकेटी खातीर 44 धांवड्यांची भागिदारी केली. चवथे ओव्हरींत टी नटराजनान गुरबाजाक बाद करून हैदराबादाक पयलें येस मेळोवन दिलें.

गुरबाजान 14 बॉलांनी 23 धांवड्यो केल्यो. सुनील नरेनान 16 बॉलांनी 21 धांवड्यांचें योगदान दिलें. ते उपरांत श्रेयस आनी अय्यर हांणी डाव मुखार व्हरून जैत निश्चीत केलें. हैदराबादा वतीन पॅट कमिन्स आनी नटराजन हाणें एकेक विकेट घेतली.

हैदराबाद ही मॅच हारलो तरी ताका फायनलींत सुवात मेळोवपाची आनीक एक संद आसा. आयज राजस्थान रॉयल्स आनी रॉयल चॅलेंजर्स बंगळुरू ह्या पंगडां मदीं एलिमिनेटर मॅच जातली. हातूंत जिखपी पंगडा आड हैदराबाद क्वॉलिफायर दोन मॅचींत खेळटलो.

अंदूंच्या हंगामांत सगल्यांत चड आक्रमक बॅटींग आशिल्ल्या सनराझर्स हैदराबादान निर्शेणी हाडली. कोलकाता नायट रायडर्साचो फास्ट बॉलर मिचेल स्टार्कान पयल्या स्पेलांत तीन विकेटी घेवन हैदराबादाक संकश्टांत घालो. राहुल त्रिपाठी आनी हॅन्रिच क्लासेन हांणी कांय प्रमाणांत प्रतिकार केलो. पूण, तांकां अखेर मेरेन खेळपट्टीचेर रावपाक जमलें ना. मुखेली पॅट कमिन्सान अखेरच्या ओव्हरींनी 30 धांवड्यांची खेळी केल्ल्यान हैदराबादाक सन्मानजनक धांवसंख्ये मेरेन पावप शक्य जालें.

24.75 कोटींचो बॉलर मिचेल स्टार्कान पयलेच ओव्हरींत ट्रॅव्हिस हेडाक बोल्ड केलो आनी पांचव्या बॉलाचेर नितीश रेड्डी (9) आनी शाहबाज अहमद (0) हांकां सेगीत दोन बॉलांचेर बाद केले. वैभव अरोरान दुसरे ओव्हरींत हैदराबादाचो दुसरो ओपनर अभिषेक शर्माक (3) बाद करून कोलकाताक मॅचीचेर घट्ट पकड मेळोवन दिली.

पावर प्लेंत हैदराबादाची अवस्था 4 बाद 45 अशी जाल्ली. जीवनदान मेळिल्ल्या त्रिपाठीन आनी क्लासेनान 37 बॉलांनी 62 धांवड्यांची भागिदारी करून पंगडाक बरे स्थितींत हाडपाचो यत्न केलो. पूण, ही जोडी वरुण चक्रवर्तीन फोडली. क्लासेन 21 बॉलांनी 32 धांवड्यो करून बाद जालो. ताणें तीन चवके आनी एक सको मारलो.

त्रिपाठीची आडखळ कोलकाताक जावपाक लागिल्ली. पूण, 13वे ओव्हरींत अब्दुल समद आनी त्रिपाठी हांचे मदीं समनव्यताचो उणाव दिसलो. त्रिपाठी 35 बॉलांनी सात चवके आनी एका सक्याचे मजतीन 55 धांवड्यो करून धांवबाद जालो.

इम्पॅक्ट प्लेयर म्हणून हैदराबादान सनवीर सिंगाक धाडलो. पूण, सुनील नरेनान फिशालकायेन बॉल घालून ताका बोल्ड केलो. अब्दुल 12 बॉलांनी 16 धांवड्यो करून हर्षित राणाक विकेट दिवन परतलो.

भुवनेश्वर कुमाराक खातें लेगीत उगडपाक जमलें ना. वरुण चक्रवर्तीन ताका एलबीडब्ल्यू बाद केलो. वरुणान 26 धांवड्यो दिवन 2 विकेटी घेतल्यो. मुखेली पॅट कमिन्सान 24 बॉलांनी 30 धांवड्यो केल्यो. ताका लागून हैदराबादाक 19.3 ओव्हरींनी 159 धांवड्यां मेरेन मजल मारप शक्य जालें.