भांगरभूंय | प्रतिनिधी
इंडीयन प्रिमीयर लिगेची (आयपीएल) 28वी मॅच येजमान कोलकाता नायट रायडर्स आनी लखनौ सुपर जायण्ट्स ह्या पंगडां मदीं हांगाच्या इडन गार्डन्स मैदानाचेर जातली. दोनूय पंगडांक फाटले मॅचींत हार घेवची पडल्या. ताका लागून दोगूय जैताची गाडी रुळाचेर हाडपाच्या यत्नांत आसतले.
दोनूय पंगडां मदीं अजून मेरेन फकत तीन मॅची जाल्यात आनी सगल्यो मॅची लखनौन जिखल्यात.
कोलकाताचो अश्टतासांचो खेळगडो सुनील नरेनान घरच्या इडन गार्डन्स मैदानाचेर आपले बॉलिंगे वरवीं प्रतिस्पर्धी पंगडांक नाकापुरो केला. नरेनान 2012त आपलो पयलो हंगाम खेळिल्लो. त्या हंगामांत इडन गार्डन्सांत ताची इकॉनमी 7.66 आशिल्ली. इडन गार्डन्साची दर हंगामांत इकॉनोमी वाडत वता. सध्याच्या हंगामांत ताची इकॉनोमी 10च्या भायर पावल्या. दुसरे वटेन सुनीलाची इकॉनोमी ह्या मैदानाचेर फकत 2019त 8 वयर गेल्ली. स हंगामांनी ती 6.5 परस उणी आशिल्ली. सध्याच्या हंगामांत ताची इकॉनोमी 4.75 इतकी आसा.
दुसरे वटेन लखनौचो मुखेली लोकेश राहुलाक सावकाश बॅटींग केल्ले खातीर टिकेक तोंड दिवचें पडलां. लखनौचो मुखेली जाल्या सावन राहुलाची स्ट्रायक रेट खूब उणी जाल्या. पूण, दिल्ली कॅपिटल्सा आड ताणें सुरवातीच्या 10 बॉलांनी 25 धांवड्यो केल्ल्यो. आक्रमक बॅटींग करून टिकाकारांची तोंडां बंद करपाचो ताचो यत्न आसतलो.
लखनौचो निकोलस पुरन फॉर्मांत आसा. तो कोलकाता खातीर खतरनाक थारुये. पयल्या 10 बॉलांनी ताची स्ट्रायक रेट 130 इतली आसा. पूण, 11-20 बॉलांनी ताची स्ट्रायक रेट वाडून 160.2 इतकी जाता. पुरन 20 परस चड बॉल खेळ्ळे जाल्यार ताची स्ट्रायक रेट 171.1 इतकी जाता. आंद्रे रसेलान पुरनाक चार खेपे बाद केला. सुनील नरेनान लेगीत ताका तीन खेपे तंबूंत धाडला. मिचेल स्टार्कान ताका दोन खेपे बाद केला. ताका लागून पुरन आड कोलकाताचे बॉलर हें झूज पळोवपा सारकें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
