भांगरभूंय | प्रतिनिधी
कोलकाता, खबरां संस्था: कोलकाताच्या आरजी कर मेडिकल कॉलेज आनी हॉस्पिटलांत ९ ऑगस्टाक प्रशिक्षीत दोतोराचेर बलात्कार-हत्या केल्ल्याचो निशेध करपा खातीर कनिश्ट दोतोरांच्या संपाचो आयज ३२ वो दीस.
भलायकी खात्यान मंगळारा दोतोरांक बसके खातीर आपयल्ले. मुख्यमंत्री ममता बॅनर्जी हे बसकेक हजर रावली. सुमार ८० मिनटां तिणें दोतोरांच्या शिष्टमंडळाची वाट पळयली. मात ते येवंक नाशिल्ल्यान ममता बॅनर्जी थंयच्यान भायर सरली. दोतोरांनी बसकेक येवपाक न्हयकार दिलो आनी म्हणलें, जांचो राजिनामो आमी मागतात (मुखेल सचीव भलायकी) ते बसका आपयतात. हो आंदोलनाचो अपमान.
ताचे पयलीं सर्वोच्च न्यायालयाच्या निर्देशांचो अपमान करीत डॉक्टरांनी १० सप्टेंबराक भलायकी भवना मेरेन मोर्चा काडून आंदोलन केलें. जे रातभर चल्लें. ह्या वेळार पिडेस्ताचे आवय-बापूयय आयले.
पिडेस्ताचे आवयन सांगलें, आपलीं हजारांनी भुरगीं रस्त्याचेर आसात. ताका लागून हांव घरा बसूंक शकली ना. मुख्यमंत्र्यांनी म्हाका महोत्सवाक वांटो घेवपाक सांगिल्लें. मात आतां होच म्हजो सण.
आनीक ५ पोक्सो कोर्ट उगडटले
अस्तंत बंगाल मंत्रीमंडळान राज्यांत आनीक ५ खाशेले पोक्सो न्यायालयां तयार करपाच्या प्रस्तावाक मान्यताय दिल्या. ह्या निर्णया उपरांत अशा न्यायालयांची संख्या वाडून ६७ जाल्या. तशेंच केशी बेगीन निवाडो करपा खातीर ६ ई-पोक्सो न्यायालयां कार्यरत आसात अशें अर्थ राज्यमंत्री चंद्रिमा भट्टाचार्य हांणी सांगलें. दुसरे वटेन आरजी कार कॉलेजीच्या प्रस्नाचेर मुख्यमंत्री ममता बॅनर्जी सोडून हेर खंयचोच मंत्री कसलेंच विधान करचो ना अशेंय बंगाल मंत्रीमंडळांत थारायलां अशें एका सूत्रान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
