भांगरभूंय | प्रतिनिधी
नवी दिल्ली, खबरां संस्था ः कोलकातांतल्या आर. जी. कर मेडिकल कॉलेजीतले बायल दोतोराचेर बलात्कार करुन तिचो खून केलो. ह्या घडणुकीचो निशेध देशभरांतल्यान चालू आसा. हे प्रकरणाचे सुनावणे वेळार सर्वोच्च न्यायालयान म्हत्वाचो आदेश दिलो. ह्या प्रकरणांतलीं त्या बायल दोतोराची सगळीं चित्रां सोशल मिडियावेल्यान काडून उडोवपाचो आदेश सर्वोच्च न्यायालयान दिला. आदेशा प्रमाण बलात्कार पिडितेची वळख भौशीक करपाक फावना. अशें आसून लेगीत पिडितेचे फोटो सोशल मिडिया प्लॅटफॉर्माचेर कशें गेलें? ते बेगोबेग काडून उडोवपाचो आदेश न्यायालयान दिलो.
हाचे उपरांत इलॅक्ट्रॉनिक्स आनी म्हायती तंत्रज्ञान मंत्रालयान सोशल मिडिया प्लॅटफॉर्माक न्यायालयाच्या आदेशाक पाळो दिवपाचे निर्देश दिल्या. कोलकातांतल्या आर. जी. कर मेडिकल कॉलेजीत बलात्कार आनी खून जाल्ल्या प्रशिक्षीत दोतोराचें नांव, फोटो आनी व्हिडियो काडून उडोवपाक सांगलां. हो आदेश पाळलो ना जाल्यार नेमा प्रमाण कारवाय जातली अशेंय मंत्रालयान सांगला.
तशेंच न्यायालयान दिल्ल्या आदेशा प्रमाण संबंदीत घडणुकेची गुप्तताय राखप गरजेचें आसा, देखून सोशल मिडिया प्लॅटफॉर्मान ह्या आदेशाचें बेगोबेग पालन करप म्हत्वाचें आसा. तशेंच इलॅक्ट्रॉनिक्स आनी आयटी मंत्रालयान सगल्या सोशल मिडिया कंपनींक अशी संवेदनशील म्हायती हाचे फुडें पातळावची न्हय अशीं शिटकावणी दिल्या. हाचे वांगडाच सर्वोच्च न्यायालयाच्या आदेशाक पाळो दिवंक ना जाल्यार कायदेशीर परिणाम आनी फुडली कारवाय जातली अशें आयटी मंत्रालयानय स्पश्ट केलां. तशेंच न्यायालयाच्या आदेशाक पाळो दिवन घेतिल्ले कारवाये विशीं सगळ्या सोशल मिडिया प्लॅटफॉर्मांक [email protected] कडेन म्हायती दिवपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
