कोलकाताचें निमाण्या बॉलाचेर जैत

भांगरभूंय | प्रतिनिधी

कोलकाता नायट रायडर्सान इंडियन प्रिमियर लिगेचे (आयपीएल) 53वे मॅचींत पंजाब किंग्साक निमाण्या बॉलाचेर हारयलो. पंजाबान दिल्ले 180 धांवड्यांचे मोखीचो फाटलाव कोलकातान 5 विकेटी राखून केलो.

ह्या जैता सयत कोलकाता नायट रायडर्सान 10 गुणां सयत गुणतकट्यांत पांचवे सुवातेर उडी घेतली. दुसरे वटेन पंजाब किंग्साची प्ले ऑफांत वचपाच्या मार्गांत अडचण निर्माण जाली.

कोलकाता नायट रायडर्साचो मुखेली नितीश राणाचो अर्द शेंकडो मॅचींत म्हत्वाचो थारलो. ताचे पयलीं स्पिनरांनी बरी बॉलींग घाल्लीच. आंद्रे रसेल आनी रिंकू सिंग हांणी 26 बॉलांनी 54 धांवड्यांची केल्ली भागिदारी निर्णायक थारली. रिंकून अखेरच्या बॉलाचेर चवको मारून आपल्या पंगडाक म्हत्वाचें जैत मेळोवन दिलें.

ते पयलीं गुरबाज आनी इम्पॅक्ट प्लेयर जेसन रॉय हांणी कोलकाताक बरी सुरवात करून दिल्ली. पांचवे ओव्हरींत नॅथन एलिसान पंजाब किंग्साक पयलें येस मेळोवन दिलें. ताणें गुरबाजाक (15) एलबीडब्लू बाद केलो. कोलकातान पावर प्लेंत 1 विकेट वगडावन 52 धांवड्यो केल्यो. हरप्रीत ब्रारान आठवे ओव्हरींत रॉयाची (38) म्हत्वाची विकेट मेळोवन दिली. ते उपरांत राणान लिव्हिंगस्टोनाचे 11वे ओव्हरींत 16 धांवड्यो करून पंगडा वयलें चेपण हलकें केलें. राणा आनी वेंकटेश अय्यर हांणी तिसरे विकेटी खातीर 38 बॉलांनी 51 धांवड्यांची भागिदारी करून पंजाबाच्या हातांतली मॅच काडून घेतली.

ते आदीं शिखर धवनान टॉस जिखून पयलीं बॅटींग करपाचो निर्णय घेतलो. प्रभसिमरन सिंगान पयलेच ओव्हरींत वैभव अरोराक तीन चवके मारून आपल्या पंगडाक बरी सुरवात करून दिली. पूण, दुसरे ओव्हरींत हर्षित राणान पंजाब किंग्साक धपको दिलो.

प्रभसिमरन (12) स्टेप आवट जावन मुखार येवपाचो यत्न केलो. पूण, विकेटकीपर रहमनुल्लाह गुरबाजाच्या हातांत कॅच दिवन तो बाद जालो. हर्षितान ताचे फुडले ओव्हरींत आनीक एक विकेट घेतना भानुका राजपक्षाक खातें लेगीत उगडपाक दिलें ना. पूण, लिएम लिव्हिंगस्टोनान वातावरण परतून बदल्लें आनी आंद्रे रसेलाक सेगीत तीन चवके मारले. ताका आडावपाक कोलकाता नायट रायडर्सान मिस्ट्री स्पिनर वरुण चक्रवर्तीक हाडलो आनी ताणें लिव्हिंगस्टोनाक (15) एलबीडब्ल्यू बाद केलो. पावर प्लेंत पंजाबान 53 धांवड्यांचेर तीन विकेटी वगडायल्यो.

जितेश शर्मा आनी शिखर धवन हांणी संयमी खेळ करून पंजाबाक 10 ओव्हरींनी 3 बाद 82 धांवड्यां मेरेन पावयलो. ह्या दोगांयनी 38 बॉलांनी अर्द शेंकड्याची भागिदारी पुर्ण केली. 13वे ओव्हरींत वरुणाच्या बॉलाचेर लेट कट मारपाच्या यत्नांत जितेश (21) विकेटकीपर गुरबाजाच्या हातांत कॅच दिवन तंबूंत परतलो. धवन दुसरे वटेन विकेट सांबाळून खेळटालो. कोलकाता नायट रायडर्साचो मुखेली नितीश राणा बॉलिंगेक आयलो आनी ताणें धवनाची विकेट घेतली.

धवन 47 बॉलांनी 9 चवके आनी 1 सक्या सयत 57 धांवड्यो केल्यो. विराट कोहली उपरांत आयपीएलांत 50 अर्द शेंकडे पुर्ण करपी धवन दुसरो भारतीय बॅट्समन थारलो. ऋषी धवन (19) आनी सॅम करन (4) हांकां वळेरेन चक्रवर्ती आनी सुयश शर्मा हांणी बाद केले. हरप्रीत ब्रार (नाबाद 17) आनी शाहरुख खान (नाबाद 21) हांणी पंगडाक 7 बाद 179 धांवड्यां मेरेन मजल मारून दिली.