भांगरभूंय | प्रतिनिधी
कोलकाता नायट रायडर्सान सगल्या विभागांनी जबरदस्त प्रदर्शन करीत येजमान चेन्नय सुपरकिंग्सा आड झणझणीत जैत जोडलें. सुमार 600 परस अदीक दिसांनी मुखेल म्हणून चेपॉक मैदानाचेर फुडारपण करपी महेंद्रसिंग धोनीक चेन्नय सुपरकिंग्साक जैताच्या मार्गार हाडपाक जमलें ना.
कोलकाताच्या बॉलरांच्या उत्कृश्ट प्रदर्शना उपरांत बॅट्समनांनी सहज जैत मेळोवन दिलें.
चेन्नय पंगडान दिल्ली 104 धांवड्यांची मोख कोलकातान 8 विकेटी राखून मेळयली.
पयलीं बॅटींग करपाक आयिल्ल्या चेन्नय सुपरकिंग्साक 9 विकेटी व्हगडावन फकत 103 धांवड्यो करप शक्य जाल्यो. चेपॉक मैदाना वयली ही तांची सगल्यांत उणी धांवसंख्या थारली. शिवम दुबेन 29 बॉलांनी तीन चवक्यांचे मजतीन नाबाद 31 धांवड्यो केल्यो. दोन जीवदान मेळिल्ल्या विजय शंकरान 29 धांवड्यो केल्यो. ह्या दोगां खेरीत डेव्हॉन कॉन्वे (12) आनी राहुल त्रिपाठी (16) हांकांच दोट्टी आंकडो हुपपाक शक्य जालें. धोनी स्पिनरांक चुकोवपा खातीर णववे सुवातेर बॅटिंगेक आयलो. 4 बॅट्समन 65 धांवड्यांचेर तंबूंत गेले आसतना ताणें आर आश्विनाक (1) आपले पयलीं धाडलो. इम्पॅक्ट प्लेयर म्हणून दीपक हुडा हो अतिरिक्त बॅट्समन चेन्नय पंगडान खेळयलो. हुडाक खातें लेगीत उगडपाक जमलें ना. रवींद्र जडेजा शुन्याचेर बाद जालो. सुनील नरेनान 3, वरुण चक्रवर्ती आनी हर्षित राणा हांणी दरेकी 2 विकेटी घेतल्यो. वैभव अरोरा आनी मोईन अली हांणी पावर प्लेंत चेन्नयक शांत दवरून 32 धांवड्यांचेर दोन धपके दिले. ते उपरांत 7 ते 18वे ओव्हरी मेरेन चेन्नय एक चवको लेगीत मारपाक जमलो ना.
कोलकाताच्या क्विंटन डी कॉक आनी सुनील नरेन हांणी चार ओव्हरींनी 46 धांवड्यो करून चेन्नय पुर्णपणान बॅकफुटाचेर धुकल्लो. चेन्नय घरच्या मैदानाचेर खेळटा अशें मातूय दिसूंक ना. कोलकातान पुर्णपणान तांचेर शेक दवरलो.
चेन्नय वतीन पदार्पण करपी अंशूल कम्बोजान पयलें येस मेळोवन दिलें. क्विंटन 16 बॉलांनी 23 धांवड्यो करून बाद जालो. सुनील नरेनान 18 बॉलांनी दोन चवके आनी पांच सक्यांचे मजतीन 44 धांवड्यांची खेळी केली. अखेरेक ताका नूर अहमदान बाद केलो. कोलकातान 10.1 ओव्हरींनी 2 विकेटी व्हगडावन 107 धांवड्यो करून जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
