भांगरभूंय | प्रतिनिधी
कोलकाता, खबरां संस्था ः दिल्ली आसूं, मुंबय आसूं वा बेंगळुरू आसूं, सगळेकडेन मेट्रो पळयलाच. पूण आतां भारतांत पयलेच खेपे मेट्रो न्हंयें सकयल्यान वतली. हाका लागून वरां लागपी प्रवास कांय मिण्टांनी पुराय जातलो. फकत एका मिण्टांत मेट्रोन हुगळी न्हंय हुंपपाक मेळटली. प्रधानमंत्री नरेंद्र मोदी आयज ह्या अंडरवॉटर मेट्रो ट्रेनीचें उक्तावण करतले.
देशांतली पयली मेट्रो ट्रेन 1984 वर्सा कोलकाता सुरु जाली. हो मार्ग उत्तर- दक्षीण कॉरिडॉर (ब्ल्यू लायन) आशिल्लो. 40 वर्सां उपरांत परतून एक फावट अंडरवॉटर मेट्रो ट्रेन आयज सुरु जाता. हांगा जमनी सावन ३३ मीटर आनी हुगळी न्हंयेंच्या पृश्ठाभागा सावन १३ मिटर सकयल ५२० मिटर लांब बोगद्यांत दोन ट्रॅक घाल्यात.
हावडा स्टेशन ते महाकरण स्टेशना मेरेनचो 520 मीटर लांब प्रवास बोगद्यांतल्यान मेट्रो वरवीं पुराय जातलो. ट्रेन 80 किमी/ वराक ह्या वेगान फकत 45 सेकंदांनी बोगद्यांतलें अंतर पुराय करतली. ह्या बोगद्यांतल्यान हावडाक कोलकाता कडेन जोडटले आनी दर दिसा 7 ते 10 लाख लोकांची येरादारी सोंपी जातली.
अंडरवॉटर आशिल्लीं कांय मेट्रो मार्गां उदेंत- अस्तंत कॉरिडॉरचो (ग्रीन लायन) भाग आसून तातूंत हावडा मैदान ते एस्प्लेनेड मेरेनचो ४.८ किमीचो मार्ग तयार आसा. हांगा 4 भूंयगत स्टेशनां आसात – हावडा मैदान, हावडा स्टेशन, महाकरण आनी एस्प्लेनेड. हावडडा स्टेशन जमनी सावन 30 मीटर अंतराचेर आसा. हें संवसारांतलें सगळ्यांत खोल मेट्रो स्टेशन. सद्या उदका पोंदा मेट्रो मार्ग फकत लंडन आनी पॅरिसांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
