भांगरभूंय | प्रतिनिधी
न्या. चंद्रचूड हांचें केशी बेगीन हाता वेगळ्यो करपाचें आवाहन
नवी दिल्ली, खबरां संस्था : न्यायालयांनी केशींची सुनावणी जावपाक कळाव जाता, ते विशीं सरन्यायाधीश डी. वाय. चंद्रचूड हांणी हुस्को उक्तायला. ह्या वेळार सनी देओल हांच्या ‘दमिनी’ सिनेमांतल्या ‘तारीख पे तारीख’ ह्या संवादाचीय तांणी याद करुन दिली. न्यायालयाचो ‘तारीख पे तारीख’ असो अर्थ लावचो अशें आमकां बिल्कुल दिसना. गरज पडल्यारच सुनावणी फुडें धुकलची. हांवें मागयिल्ले म्हायती प्रमाण आतां मेरेन 178 प्रकरणां फुडें धुकलपाची मागणी केल्या. ऑक्टोबराच्या निमाणे मेरेन 3 हजार 688 प्रकरणांनी ही मागणी जाल्या. ही गजाल हु्स्क्याची आसा अशेंय न्या. चंद्रचूड हांणी सांगलें.
न्या. चंद्रचूड हांणी केलें आवाहन
प्रकरणांचे सुनावणेक तारखे उपरांत तारीख मेळतच उरल्यार न्यायवेवस्थेनयलो लोकांचो विस्वास उणो जातलो. गरज ना जाल्यार फुडली तारीख दिवची न्हय, कळाव करचो न्हय वा सुनावणी टाळची न्हय अशें सगळ्यांक हांव आवाहन करतां.
न्या. चंद्रचूड हांच्या म्हणण्या प्रमाण सप्टेंबरांत 2361 प्रकरणां आसात, जातूंत फुडली तारीख मागल्या. अशी मागणी करप चुकीचें. अशीं जर फुडली तारीख दित रावले जाल्यार लोक आमचेर न्यायालय म्हणून कसो विस्वास दवरतले?
म्हत्वाचें म्हणल्यार आतांच न्हय तर हाचे पयलीं न्यायाधीश चंद्रचूड हांणी तारीख पडपा विशीं एका वकिलाक तापयल्ले. तशेंच तांणी न्यायालयांत मोबायल फोनाचेर उलयिल्ल्यान वकिलाक तापयल्ले. कोर्टाच्या कर्मचाऱ्यांक तांचो फोनय जप्त करपाचो आदेशूय न्या. चंद्रचूड हांणी दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
