कोरोना रिटर्न्स

भांगरभूंय | प्रतिनिधी

अग्रलेख

—————————————–

चीनांतल्यान विमान, रस्तो मार्गान येवपी सगल्यांचेर बारीकसाणीन नदर दवरची पडटली. कोण आयलोच जाल्यार ताका आठ दीस तरी देखरेखी खाला दवरपचो पडटलो. 

—————————————-

आनीक तीन म्हयन्यांनी कोरोनान भारतांत सांवार घालून तीन वर्सां पुराय जातलीं. 24 मार्च 2020 सावन आमचो देश कोरोना आड दोन हात करपाक उबो रावलो. लाॅकडावन जालो. कांय चुको, मस्ती, निर्णय घेवपाक आळसाय केल्ल्यान ताचे पानवळ आमकां सगल्यांकूच भोगचें पडलें. दर एका घराण्यांतलो एक तरी मनीस ह्या भिरांकूळ कोरोनाक लागून अंतरलो म्हणल्यार अतिताय जावची ना. सप्टेंबर 2020, मे 2021 हे तर सामकेच  घात- म्हयने थारले. मे म्हयन्यांत कितले गेले, तें मेजून सोंपचेंना. आमच्या गोंयांत तर आॅक्सिजनाच्या उणावाक लागून बऱ्याच जाणांक जीव सोडचो पडलो.  हे दीस परत येवचे न्हय. गोंयांत कोरोनाक लागून आतां मेरेन 4013 लोकांक मरण आयलां. तर वट्ट 2 लाख 59 हजार 061 लोकांक कोरोनाची लागण जाल्या. अजूनय 13 जाण कोरोनाचेर उपचार घेतात. सध्या कोरोनांतल्यान बरो जावपाचो गोंयांतलो दर 98.45 टक्के आसा. लागीं लागीं सगले निर्बंध सरकारान काडल्यात. कांय लोक आपूण जावन मास्क घालतात, हेर उपाय घेतात ही गजाल खोशेची. तरीय चीनांत जें कितें चल्लां ताचे कडेन सामकीच आडनदर करून उपकारची ना. हुनहुनीत दुदाच्या घोटान जीब लासली जाल्यार मागीर तो मनीस ताक पसून फूक मारून पियेता. तेन्ना उपचारां परस खबरदारी, सुरक्षा घेवप केन्नाय बरें, हें सरकारी यंत्रणेक आमी सांगपाची गरज ना. 

चीनाचें एक खाशेलेंपण आसा. थंय कितें घडटा, तें भायर सरपाक 3- 4 दीस लागतात. पयलीं आठ- आठ दीस कांय कळनाशिल्लें. हालींसराक सोशल मिडिया आसून पसून हें जाता. जाॅन होपकिन्स विद्यापीठाचे म्हायती प्रमाण, चीनांत फाटल्या 28 दिसांनी 9 लाख 17 हजार 308 लोकांक कोरोना जाला. जाल्यार एकूण दुयेंती 42 लाख 93 हजाराचेर पावल्या. मरप्यांचो आंकडो 16,539 इतलो आसा. शेजारी जपानांतूय कोरोना पातळ्ळा. अमेरिकेंत फाटल्या 28 दिसांनी 16 लाख नवे कोरोना दुयेंती सांपडल्यात. चीनांत सध्या जो बीएफ. 7 कोरोना विशाणू सक्रीय जाला,  ताचे चार दुयेंती भारतांत सांपडल्यात. तातूंत दोग जाण अमेरिकेच्यान दोन म्हयन्यां पयलीं गुजरातांत आयिल्ले. ते आतां पुराय बरे जाल्यात. चीनांतलो सध्याचो विशाणू तितलो घातक ना. ताका लागून मरप्यांचें प्रमाण उणें आसा, मात तो वेगान पातळटा. फुडल्या मार्च मेरेन तो 60 टक्के चीनीक बादतलो, अशें जाणकारांचें म्हणणें. तर 10 लाख लोकांक मरण येवं येता, असो आॅस्ट्रेलियेंतल्या एका विद्यापीठाचो दावो. सध्या चीनांत 18 वर्सां वयल्या 90 टक्के लोकांनी वाशिनां घेतल्यांत. ताका लागून दुयेंसाक लागून त्रास जातले, पूण मरण येवपाचें प्रमाण खूबच उणें आसतलें, अशें चीनी तज्ञांचें मत. अर्थांत मतां, दावे हाका कांय अर्थ नासता. प्रत्यक्षांत भलतेंच घडटा. वेळ येवचे पयलींच सादूर रावंक जाय. 

कोविशिल्डाचे तयार करपी उद्देगपती अदर पुनावाला हांच्या मतान, भारतीयांक व्हडलीशी बादा जावची ना, कारण आमी वासिनां घेतल्यांत. नवीं वासिनां तयार करपाचें कामूय चालू आसा. तांच्या मतान, सगल्यांत म्हत्वाचें म्हणल्यार आमकां भलायकी मंत्रालयान घाल्ले नेम पाळचे पडटले. तातूंत मास्क घालप, सुरक्षीत अंतर दवरप, हात धुंवप, शिंको, खोकली येतना तोंडाचेर हात वा लेस धरप, गर्दी आसा थंय वचप ना, ह्या नेमांचो आसपाव आसा. सध्या भलायकी मंत्र्यान राहुल गांधी हांकां भारत जोडो यात्रा नेम पाळून करपा विशीं पत्र बरयलां. कारण हजारांनी लोक एकठांय येतात. पत्राचेर राजकारण करीनासतना कोरोना नदरे मुखार दवरून कितें तो निर्णय बेगीन घेवपाक जाय. चीनांतल्यान विमान, रस्तो मार्गान येवपी सगल्यांचेर बारीकसाणीन नदर दवरची पडटली. कोण आयलोच जाल्यार ताका आठ दीस तरी देखरेखी खाला दवरपचो पडटलो. नाजाल्यार हें प्रकरण आंगलट येवपाक वेळ लागचो ना. फाटले खेपे विमान प्रवासाक लागून कोरोनाच्या धामींत तेल ओतिल्ले सारकें जाल्लें. इतलेंय करतना अर्थवेवस्थेचेरूय लक्ष दवरचें पडटलें. कोरोना परत आयला. देशांत तो पातळचोना हाची खबरदारी घेवया. पयलींच भियेवपाची गरज ना.