कोरोना काळा उपरांत गोंयांत चार्टर विमानांनी वाड

भांगरभूंय | प्रतिनिधी

भांगरभूंय । समीप नार्वेंकार

पणजीः फाटल्या कांय वर्सां चार्टर विमानांत उणाव दिसून आयले उपरांत गोंयांत 2022- 23 त चार्टर विमानांत खूब वाड जाल्ली दिश्टी पडटा. कोरोना म्हामारीक लागून गोंयांत चार्टर विमानां येवपाचीं सामकींच बंद जाल्लीं. पूण कोरोना म्हामारी काळा उपरांत ही वाड जावपाक लागल्या.

पर्यटन खात्यान दिल्ले आंकडेवारी प्रमाण ऑक्टोबर 2022 ते मार्च 2023 मेरेन 334 चार्टर विमानांनी 69,691 पर्यटक गोंयांत आयिल्ले. ताका लागून फाटलीं पांच वर्सां चार्टर विमानांत सेगीत उणाव जाले उपरांत गोंयच्या पर्यटन मळार परतून एक फावट चालना मेळपाक सुरवात जाल्या.

ऑक्टोबर 2017 ते मे 2018 ह्या काळांत चार्टर विमानांनी उणाव जावपाक सुरवात जाली. ह्या वर्सा 981 विमानांना 2,47,365 पर्यटक गोंयांत आयिल्ले. हो आंकडो परतून एकदां उणो जावन ऑक्टोबर 2018 ते मे 2019 ह्या काळांत 813 विमानांनी 2,18,876 पर्यटक आयिल्ले. फुडल्या वर्सा तातूंत परतून उणाव जावन ऑक्टोबर 2019 ते मे 2020 ह्या काळांत 625 विमानांनी 1,69,142 पर्यटक आयिल्ले. पूण 2021 त हो आंकडो सामको शुन्याचेर पावलो. कोरोनाक लागून आंतरराष्ट्रीय प्रवास सामकोच बंद आशिल्लो, ताका लागून एकूय विमान ह्या काळांत येवंक ना. पूण कोरोना सोंपले उपरांत 2022- 23 त चार्टर विमानांनी गोंयांत येवपाक सुरवात केली.

ऑक्टोबर 2021 ते मे 2022 त जेन्ना पर्टयन वेवसाय जाग्यार पडपाक सुरवात जाल्ली तेन्ना फक्त 42 विमानांनी 7,630 पर्यटक आयले. पूण ऑक्टोबर 2022 ते मार्च 2023 हो काळ चार्टर मळा खातीर खोशयेचो काळ थारलो. ह्या काळांत 334 विमानांनी 69,691 पर्यटक आयले. हो आंकडो व्हडलो नासलो तरी लेगीत पोरीं चड वाड जाल्या हें खरें. हो आंकडो कोरोना काळा पयलींचो आंकडो हुपूंक पावूंक ना, तरी लेगीत ही मात्शी वाड थळावी अर्थवेवस्था आनी पर्यटन मळाक थाकाय दिवपा सारकी आसा. पर्यटन मळा कडेन संबंदीत आशिल्ले भागधारकांच्यो फुडारा खातीर खूबश्यो इत्सा आनी अपेक्षा आसात. येता त्या पर्यटन मोसमांत चार्टर विमानांत वाड करून जी स्थिती कोराना काळा पयलीं आसली ती परतून हाडपाचे यत्न चालू आसात. जसो जसो आंतरराश्ट्रीय पर्यटन ल्हवू ल्हवू जाग्यार पडत आसा तेच वांगडा गोंय हें आंतरराष्ट्रीय प्रवाशांक भेट दिवपा खातीर पयलें थळ आसतलें, अशी आस्त पर्यटन भागधारकांनी उक्तायल्या.