भांगरभूंय | प्रतिनिधी
लोकांचो जीव घेवपी एक बॅक्टेरिया जपानांत वेगान पातळटा
टोकियो, खबरां संस्था: संवसारांत कोरोना सारकी महामारी सुरू जाली आनी तातूंत लाखांनी लोकांचो जीव गेलो. कोरोना वासीन मेळ्ळे उपरांत कोरोनाचे परिणाम उणे करप शक्य जालें. कोरोनाचें संकश्ट उणें जाता थंयच आसा आतां परत एक फावट संवसारांत चिंता करपा सारकी गजाल घडल्या. लोकांचो जीव घेवपी एक बॅक्टेरिया जपानांत सांपडला. स्ट्रेप्टोकोकल टॉक्सिक शॉक सिंड्रोम (STSS) अशें ह्या जीव घेवपी आनी दुर्मिळ अश्या दुयेंसाचें नांव. मेळिल्ले म्हायती प्रमाण हो रोग मांस खावपी बॅक्टेरियाक लागून जाता आनी ताचें प्रमाण पयलीं परस चड आसा. टोकियोंत ह्या दुयेंसाचे दुयेंती नेटान वाडत आसात.
४८ वरां भितर दुयेंतींक मरण आयलें
हो रोग खूब धोक्याचो जाला आनी दुयेंतीक संसर्ग जाले उपरांत ४८ वरां भितर मरण येवपाक शकता. थळाव्या खबरां एजन्सीच्या अहवाला प्रमाण वर्साच्या पयल्या अर्दांत फकत टोकियोंत १४५ दुयेंती सांपडल्यात. हातूंतलीं चडशीं प्रकरणां ३० वर्सां पिराये परस चड वर्सांच्या लोकां मदीं आसा. ह्या दुयेंसांतल्यान मरण येवपाचें प्रमाण सुमार ३० टक्के आसा.
स म्हयन्यांत णवश्यां वयर दुयेंती सांपडले
२ जून मेरेन देशांत ९७७ दुयेंती मेळ्ळ्यात. फाटल्या वर्सा ९४१ दुयेंती मेळिल्ले. पांयांच्या जखमांक खास करून स्ट्रेप्टोकॉक बॅक्टेरियाची लागण जावपाची शक्यताय आसता आनी फोड सारकिले ल्हान घाय प्रवेश बिंदू जावंक शकतात. जाण्ट्या दुयेंतींक संसर्ग जावन मरण येवपाक उण्यांत उणीं ४८ वरां लागूं येतात.
मेळिल्ले म्हायती प्रमाण, हे बॅक्टेरियाक लागून हातपांय दुखप आनी सुजप, जोर येवप, रगतदाब उणो जावप अशीं खर आनी नेटान वाडपी लक्षणां दिसूंक शकतात. ह्या लक्षणांक लागून स्वास घेवपाची समस्या, अवयव निकामी जावप आनी मरण येवंक शकता. ५० वर्सां वयर पिरायेचे व्यक्तींचेर खास करून ह्या दुयेंसाचे खर परिणाम जावपाची शक्यताय आसता. देखून हें दुयेंस परत एक फावट संवसारा मुखार नवें आव्हान उबें करतलें असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
