भांगरभूंय | प्रतिनिधी
नवी दिल्ली, खबरां संस्था: फाटल्या २ सप्तकां सावन देशभरांत कोरोना व्हायरसाच्या सक्रीय दुयेंतींचो आंकडो उणो जायत आसा. फाटल्या २४ वरांत ३० नवे दुयेंती मेळ्ळ्यात, जाल्यार २५२ दुयेंती बरे जाल्यात. सक्रीय दुयेंतींचो आंकडो २०८६ जाला.१२ जुनाक देशभरांत ७१३१ सक्रीय दुयेंती आशिल्ले.
भलायकी खात्याच्या म्हणण्या प्रमाण जानेवारी २०२५ सावन नव्या प्रकारच्या कोरोनाक लागून १४२ जाणांक मरण आयलां. फाटल्या २४ वरांत ३ जाणांक मरण आयलां, तातूंत दिल्लींत २ आनी हरियाणाक एकलो. फाटल्या एका म्हयन्यांत सुमार १३५ जाणांक मरण आयलां.
सिंगापूर निंबस वेरिएंट केशी वाडत आसात
ICMR-NIV (नॅशनल इन्स्टिट्यूट ऑफ व्हायरोलॉजी) संचालक डॉ.नवीन कुमार हांणी सांगलें, सिंगापूरांत निंबस वेरिएंट पातळपाचीं केशी भारतांतय दिसून येतात. फाटल्या ५-६ सप्तकांत ह्या दुयेंतींचो आंकडो नेटान वाडला. आमी चांचणी वाडयल्या. सद्या ह्या वेरिएंटांत ओमाइक्रोन सारकीं लक्षणां दिसपाक लागल्यांत.
४ नवे प्रकार मेळ्ळे
भारतांतल्या साबार राज्यांनी कोवीड-१९ दुयेंती वाडत आशिल्ल्यान देशांत चार नवे प्रकार सांपडल्यात. दक्षीण आनी अस्तंत भारतांतल्यान नोंद केल्ले प्रकार म्हळ्यार LF.7, XFG, JN.1 आनी NB.1.8.1 मालिकेचे आसात अशें आयसीएमआरचे संचालक डॉ. राजीव बहल हांणी सांगलें.
हेर सुवातींतल्यान नमुने एकठांय करून तांचो क्रम तयार करून नवे प्रकार सोदून काडपाक लागल्यात. केशी चड गंभीर नात, लोकांनी हुस्को करचो न्हय, फकत जतनाय घेवची.
संवसारीक भलायकी संघटनेनय तांकां हुस्को करपा सारकें मानूंक ना. पूण तांचें वर्गीकरण पळोवणे खाला एक वेरिएंट म्हणून केलां. चीना सयत हेर आशियाई देशांनी कोविडाच्या वाडट्या दुयेंतींत हो प्रकार दिसपाक लागला.
NB.1.8.1च्या A435S, V445H आनी T4781 सारकिले स्पायक प्रथिन उत्परिवर्तन हेर प्रकारांपरस नेटान पातळ्ळे. कोवीडा आड तयार जाल्ली रोगप्रतिकार शक्त तांचेर लेगीत परिणाम जायना.
कोवीडाचो JN.1 वेरिएंट भारतांत सगळ्यांत चड प्रमाणांत दिसता. चांचणी केल्ल्या अर्द्या परस चड नमुन्यांनी हो प्रकार मेळटा. ताचे उपरांत BA.2 (२६ टक्के) आनी ओमायक्रोन उपवंश (२० टक्के) ह्या प्रकारांचीं प्रकरणां सांपडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
