कोरी पाटी

भांगरभूंय | प्रतिनिधी

जिणेंत खंयच्याय खिणाक नवी सुरवात सुरू करप शक्य आसा. भूतकाळ विसरून ​​वर्तमान स्विकार करप आनी फुडाराच्यो शक्यताय सोदप आमच्या हातांत आसा.

कांय दिसां आदींच आमी पाडवो मनयलो. भारतीय संस्कृती प्रमाण नव्या वर्साची सुरवात आमी केली. ह्या नव्या वर्साच्या सुरवाती निमतान आमी जायते संकल्प आनी निश्चय केल्यात आसतले. मात नव्या वर्सांत मुखार सरतना, घडून गेल्ल्या आनी आतां जें आमी बदलूंक शकनात अशा भूतकाळाक फाटी उडोवन फुडारा कडेन पावल मारप आमी करतात? अशें करतले जाल्यार आमकां आमच्या जिणेची पाटी कोरी करपाक कळपाक जाय. मनशाची जीण म्हळ्यार चढ-उतारांनी भरिल्लो प्रवास. हातूंत बरे-वायट, सूख-दुख्खाचे अशे सगलेच तरेचे प्रसंग येतात. आमी अशा खिणांक जेन्ना फुडो करतात तेन्ना आमच्या मनार ताचो परिणाम जाताच. पोरण्यो यादी, पश्चात्ताप, अपेस आनी दुख्ख हाका लागून आमी भूतकाळांतच आडकून उरतात आनी फुडें वचप कठीण दिसपाक लागता. मात आमी जिणेची नवी सुरवात केन्नाय करपाक शकतात. खंयचेय परिस्थितींत भूतकाळ विसरप, दुख्ख कुशीक दवरप आनी नवी उर्जा तशेंच उमेदीन जिविताक नवी दिका दिवप अशे जायते मार्ग आसात. मानसीक, भावनीक आनी वेव्हारीक पद्दतींच्या आदारान आमी आमचें जिवीत परतून सुरू करपाक शकतात आनी भूतकाळांतल्या वेदनेंतल्यान सुटका मेळोवंक शकतात.
जिवीत परतून सुरू करपाची पयली अवस्था म्हळ्यार भूतकाळ मान्य करून सोडप. जायत्या जाणांक तें कठीण दिसता, कारण ते सतत पोरण्या यादींनी अाडकून पडटात. पूण खरें म्हणल्यार भूतकाळांत बदल करप शक्य ना, पूण तें आमी ताचे कडेन कशें पळयतात ताचेर आदारून आसता. भूतकाळाक तोंड दिवपाक तुमी तुमच्यो चुकी आनी अपेसां मान्य करचीं पडटात. स्वताक दोश दिवचे बदला तातूंतल्यान धडे घेवचे. तुमकां दुखोवपी गजाली मान्य करप खूब गरजेचें. दुखोवपी मनशांक माफ करचे पडटा. क्षमा करप म्हणल्यार चुकीक आदार दिवप न्हय, तर त्या दुख्खाच्या भारांतल्यान स्वताची सुटका करप. एकदां आमी भूतकाळाच्यो कोडू यादी काडून उडयल्यो म्हणटकच मन नव्या अणभवां खातीर मेकळे जाता.
विचाराचेर परिणाम करपी कांय मानसीक तंत्रां आपणायल्यार पोरण्या यादींचो परिणाम उणो जावंक शकता. संज्ञानात्मक वर्तन उपचार (Cognitive Behavioural Therapy – CBT) हो एक प्रभावी मार्ग. ह्या तंत्रांत नकारात्मक विचार बदलून सकारात्मक विचार तयार जावंक शकतात. स्वता कडेन नेमान संवाद सादप आनी फाटल्या घडणुकां कडेन नवे नदरेन पळोवप म्हत्वाचें. ध्यान आनी सभाव तंत्रांचो अभ्यास केल्यार तो भूतकाळांतल्या वेदनेंतल्यान पयस वचूंक शकता. केन्ना-केन्ना संमोहन वा मार्गदर्शीत दृश्यतंत्र (मार्गदर्शक व्हिज्युअलायझेशन) वापरून मनांतल्या पोरण्या यादींचो परिणाम उणो करूं येता. केन्ना-केन्ना, नवे जिवीत सुरूकरपा खातीर भायले परिस्थितींत बदल करप गरजेचें आसता. शार बदलप वा फक्त घरगुती सजावट बदलप मानसीक नदरेन उपेगी जावंक शकता. पोरणी संवय आनी यादीं नव्या सुवातेर वतना फाटीं उरतात आनी मनशाक एक नवी संद मेळटा.
तशेंच, आमचें समाजीक जिवीत बदलप म्हत्वाचें. कांय गजाली तुमकां सेगीत भूतकाळाची याद करून दितात वा नकारात्मक उर्जा पातळायतात. अशा गजालीं सावन पयस रावप बरें. नवे इश्ट जोडप, प्रेरणा दिवपी लोकां वांगडा रावप आनी सकारात्मक विचार करपाच्या वावराक चड वेळ दिवप ह्या गजालींनी मनशाची जीण सुदारता. पोरणी संवय आमकां सतत भूतकाळाची याद करून दितात, देखून ती सोडून, ​​नवी संवय विकसीत करप हो एक बेस बरो उपाय. सकाळीं उठून ध्यान, व्यायाम वा बरोवप ह्या सारकिल्ले उपक्रम केल्यार मन शांत उरता आनी मनाक उर्जा मेळटा. मनशाचें मन म्हळ्यार व्हड प्रभावी हत्यार. हें मन ताचो विकास आनी विनाश दोनूय करूंक शकता. देखून मनाक नियंत्रीत करप म्हत्वाचें.
एकदां विज्ञानिकांनी एक प्रयोग केलो. तांणी एका मनशाच्या दोळ्यार पट्टी बांदली आनी ताका सांगलें की तुज्या पांया कडेन एक सोरोप आसा. उपरांत त्या मनशाच्या पांयाक पीत तोपली आनी ताका सांगलें की तुज्या पांयाक सोरोप चाबला. कांय खिणां भितर तो मनीस मेलो आनी उपरांत ताच्या कुडीची जेन्ना तपासणी केली तेन्ना दोतोरांक त्या मनशाच्या कुडींत वीख तयार जाल्ल्याचें दिसून आयलें हाचोच अर्थ सोरपाच्या भंयान त्या मनशाचे कुडींत आपशींच वीख तयार जाल्लें. ही आसता मनाची खरसाण.
नवी कुशळटाय शिकप हो स्वताक परतून सोदून काडपाचो एक प्रभावी मार्ग. नवी भास शिकप, संगीत वाजोवप, बरोवप वा खंयचोय नवो छंद शिकप म्हळ्यार जिविताक एक नवी दिशा मेळटा. हो नव्या गजालींचो अणभव जरी सुरवेक ल्हान दिसलो तरी ताचो मानसीक परिणाम व्हड प्रमाणांत जाता. नवें ध्येय आनी मुल्यां स्वता खातीर गरजेचीं आसतात. आपणाक कितें पसंत आसा तें थारावप हे वरवीं मनीस चड शिस्तबद्ध आनी आशावादी जाता. ह्या वेळार गरज पडल्यार मानसोपचारतज्ञ, सल्लागार वा थेरपिस्ट हांचो आदार घेवप फायद्याचें थारता. मानसीक भलायके खातीर वेवसायीक मजत घेवप हें दुबळेपण न्हय जाल्यार नव्या सुरवाती खातीर सकारात्मक निर्णय थारता.
जिणेंत खंयच्याय खिणाक नवी सुरवात सुरू करप शक्य आसा. भूतकाळ विसरून ​​वर्तमान स्विकार करप आनी फुडाराच्यो शक्यताय सोदप आमच्या हातांत आसा. दृश्टीकोन बदलून, नवी संवय आपणावन, उर्बा दिवपी लोकां वांगडा रावन आनी गरज पडल्यार वेवसायीक मजतीन आमी आमचें जिवीत परतून सुरू करूंक शकतात. दरेक खीण नवी सुरवात आसता. भूतकाळाच्यो खर यादी सोडून ​​वर्तमान मान्य करपाची तयारी आसूंक जाय. नवे उर्बेन, नव्या संदींचो लाव करून घेवन, जिणेंतली ऊर्जा विकसीत करपाक आमी शिकपाक जाय.

डॉ. चिन्मय मधू घैसास
9823728640