भांगरभूंय | प्रतिनिधी
सोलः कोरियन ऑपन बॅडमिंटन सर्तींत बिरेस्तारा भारतीय शटलर एच एस प्रणय आनी प्रियांशू राजावत हांकां रावंड ऑफ 16 आपापल्या मॅचीत हार खावची पडली. बायलाचे दोट्टींत भारतीय जोडी ट्रिसा जॉली आनी गायत्री पुलेला गोपीचंद हांकाय हार खावची पडली.
दादल्यांचे एकोडीत पांचवो सिडेड प्रणयाक ली चेऊक पिऊन 21-15, 19-21, 21-18 अशें हारयलें. पयले फेरयेंत प्रणयान बेल्जियमाच्या ज्यूलिनय कैरागीक 21-13, 21-17 अशें हारयल्लें. प्रियांशू राजावताक जपानाच्या कोडाय नाराओकेन हारयलें. ताणे ऑरिलियन्स मास्टर जैतिवंत प्रियांशूचेर 21-14, 18-21, 21-17 अशी मात केली.
बायलांचे दोट्टीत ट्रिसा आनी गायत्रीक रावंड ऑफ 16ते दक्षीण कोरियाचे बेक हाना आनी लिसो ही की जोडयेन 21-14, 21-14 अशें सरळ गेमींनी हारयलें. फाटल्या जून म्हयन्यात डॅन्मार्क मास्टर सर्ती मिश्र गटांत जैत मेळोवपी एन सिक्की रेड्डी आनी रोहन कपूर जोडयेक फेंग यान झे आनी हुआंक डोन पिंग जोडयेन 21-15, 21-12 अशें हारयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
