भांगरभूंय | प्रतिनिधी
पेडणें: कोरगांव सरपंचपदार देविदास नागवेंकार हांची विरोधाविणें निवड जाली. कोरगांवची सरपंच नीता नरसे हांणी फाटल्या पंदरा दिसां आदीं आपल्या पदाचो अलिखीत करारा प्रमाण राजीनामो दिल्लो. हाका लागून सरपंच पद रितें आशिल्लें. १० तारखेर पंचायत मंडळाची विशेश बसका आयोजीत करून सरपंचपदा खातीर वेंचणूक घेतली. तेन्ना देविदास नागवेंकार हांचो एकूच एकूच अर्ज आयिल्ल्यान तांची विरोधाविणें निवड जाली.
ह्या वेळार उपसरपंच दिवाकर जाधव, पंच निता नरसे, पंच लौकीक शेट्ये, पंच उमेश च्यारी, पंच कल्पिता कलशांवकार, पंच समिल भाटलेकार आनी पंच अब्दुल नायक हाजीर आशिल्ले.
उरिल्ल्या सगल्या वांगड्यांक सरपंचपद मेळटलें
पंचायत वेंचणुकेचो कार्यकाळ १५ म्हयने उरला. ह्या १५ म्हयन्यां खातीर सगल्या पंच वांगड्यांक तीन-तीन म्हयन्यां खातीर सरपंचपद दिवपाचो अलिखित करार केला.
हातूंत कल्पिता कलशांवकार, दिवाकर जाधव, लौकीक शेट्ये, उमेश चारी आनी समीर भाटलेकार हांकां येवपी काळांत सरपंच पदाची माळ गळ्यांत पडटली.
पयलेच फावट पंचायत मंडळ आमदार प्रवीण आर्लेकार हांच्या समर्थनांत
ह्यान पयलीं जे जे सरपंच जाले तातूंत अनुराधा कोरगांवकार, अब्दुल नायक, नीता नरसे हे तिनूय सरपंच आमदार प्रवीण आर्लेकार हांचे आड आशिल्ले. मात आतां सगले पंच वांगडी तातूंत अनुराधा कोरगांवकार सोडल्यार सत्तारूढ गटांत आयिल्ल्यान आमदार प्रवीण आर्लेकार हांच्या समर्थनाक पंचायत मंडळ आयलां.
आमदार प्रवीण आर्लेकार हांणी कोरगांव पंचायत कार्यालयांत येवन नवे सरपंच देविदास नागवेंकार हांकां परबीं भेटयलीं. तांणी म्हणलें, कोरगांव पंचायत मंडळांन एकवटान पंचायत वाठाराची उदरगत करपाक जाय. ह्या गटा पसून एक पंच वांगडी पयस गेल्या. तांणीय परत ह्या गटात येवन एकवटान उदरगत करपाक यत्न करचे, असो उलो तांणी मारलो.
सरपंच देविदास नागवेंकार हांणी, पंदरा म्हयन्यांचो काळ उरला. ह्या १५ म्हयन्यांचे कारकीर्दींत जीं जीं पंचायत वाठारांतलीं उरिल्लीं कामां आसात तीं कामां आमदार प्रवीण आर्लेकार हांच्या सहकार्यांतल्यान पुराय करपाची गवाय तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
