भांगरभूंय | प्रतिनिधी
खेळां मैदान, उदका पुरवण, कोयर समस्या आनी हेर विशयांचेर चर्चा
भांगरभूंय । प्रतिनिधी
कोरगांवः कोरगांव पंचायतींतल्या प्रभाग 1 त आदीं घर आशिल्ले सुवातेर बेकायदो पांच माळयांची इमारत बांदल्या. तातूंत 25 परस अदीक कुडी आसात. एका वाड्याक जितली वीज आनी उदकाची पुरवण जाता तितली हे एके इमारतीक करची पडटा, अशें उपसरपंच नरेश कोरगांवकार हांणी सांगलें.
सरपंच समीर भाटलेकार हांचे अध्यक्षते खाला जाल्ले ग्रामसभेंत खेळां आनी युवा वेव्हार संचालनालयाचें खेळां मैदान, उदका पुरवण, कोयर समस्या, तशेंच हेर विशयांचेर जाल्ले चर्चे वांगडा पंचायत वाठारांत बांदिल्ले पांच माळयांचे इमारतीचो विशय तापलो. हे ग्रामसभेक उपसरपंच कल्पिता कलशांवकार, अब्दुल नायक, अनुराधा कोरगांवकार, देविदास नागवेंकार, दिवाकर जाधव, लौकीक शेट्ये, उमेश च्यारी, नीता नर्से, पंचायत सचीव श्रद्धा कोरगांवकार तशेंच निरिक्षक म्हूण गजानन परब हाजीर आशिल्ले.
पंचायत वाठारांत कितल्या माळयांची इमारत बांदपाक मेळटा, असो प्रस्न नरेश कोरगांवकार हांणी विचारिल्लो. ताका जाप दितना पंचायत सचिवान दोन अशी जाप दिली. अशें आसत जाल्यार ती इमारत बेकायदो थारता आनी तिचेर कारवाय जावपाक जाय, अशी मागणी सगळ्यांनीच केली.
भटवाडी वाठारांत नळांक फावोशें उदक येना आनी पंचायतूय ते खातीर यत्न करिना, अशी कागाळ विनीता मांद्रेंकार हांणी केली. जाल्यार माईण वाठारांतली उदकाची समस्या आग्नेल नरोन्हा हांणी मांडली. कोरगांवच्यान पायपलायनींतल्यान उदक फुडल्या गांवांक मेळटा जाल्यार कोरगांवाक कित्याक मेळना, असो प्रस्न करून तें आमी आडावया, अशें राजू नर्से हांणी सुचयलें. सुदीप कोरगांवकार हांणी सांगलें, पेडणें म्हालांतल्यो पायपलायनी, उदकाच्यो टांकयो 30-35 वर्सां आदल्य आसात. त्यो बदलपाची गरज आसा.
खेळां आनी युवा वेव्हार संचालनालयाच्या मैदानाचेर फुटबॉला वांगडाच हॉलिबॉल खेळपाकूय दितले, अशें सरपंच भाटलेकार हांणी एका प्रस्नाक जाप दितना सांगलें. देवानंद गावडे हांणी सांगलें, हें मैदान खेळां आनी युवा वेव्हार संचालनालया कडेन आसलें तरी ह्या मैदानाचें हस्तांतर करून ताचो ताबो पंचायतीन आपले कडेन घेवप गरजेचें आसा. रामचंद्र गोसावी हांणी सांगलें, हस्तांतर केलें जाल्यार ह्या मैदानाचेर कोरगांव पंचायतीचो हक्क उरतलो. सुदीप कोरगांवकार हांणी सांगलें, ग्रामसभेंत चर्चेक आयिल्ल्या विशयांचेर पंचायत फाटपुरवण करिना.
देवूळवाड्या वयल्या व्हाळा वयलो सांकवाचे सुवातेर नवो सांकव बांदपाचो थाराव सुदीप कोरगांवकार हांणी मांडलो आनी ताका नरेश कोरगांवकार हांणी अनुमोदन दिलें. हें आदींच्या पंचायत मंडळान एकाच घराक दोन नंबर दिल्यात ताची चवकशी करपाची मागणी नरेश कोरगांवकार हांणी केली.
ह्या वेळार भालचंद्र गोसावी, जगन्नाथ तोरस्कार, सोनू गावडे, गुणाजी गावडे हांणीय चर्चेंत वांटो घेतलो. सुरवेक सरपंच समीर वाटलेकार हांणी येवकार दिलो. उपसरपंच कल्पिता कलशांवकार हांणी उपकार मानले.
कोयर उडयतल्याक धरल्यार इनामः सरपंच
पंचायत वाठारांत खूब कडेन कोयर उडोवपाचे प्रकार सुरू आसात. ताचेर पंचायतीन उपाय काडचो. अश्यो खूबश्यो कागाळी आयले उपरांत सरपंच समीर भाटलेकार हांणी सांगलें, कोयर उडयतना कोणूय दिसलो जाल्यार ताचो फोटो काडात. असो जो कोण फोटो काडटा ताका पंचायतीन एका हजाराचें इनाम दवरलां. कोयर उडयतल्याक धरप हें दरेका मनशाची लागणूक आसा. सगळ्यांनीच ह्या वावरांत आमकां आदार करचो, अशें सरपंचान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
