कोरगांव ग्रामसभा कोयरा वयल्यान गाजली
भांगरभूंय | प्रतिनिधी
कोरगांव: कोरगांव ग्रामसभेंत कोयराचो मुद्दो बरोच गाजलो. गांवांत वता थंय कोयर उडोवन बुरशेपणा करप्यांचेर पंचायतीन दंडात्मक कारवाय करपाची अशी मागणी ग्रामस्थांनी केली. तशेंच हाका लागून गांवांतल्या पर्यावरणाचो जावपी विध्वंस आडावपा खातीर पंचायतीन योग्य पावलां उबारचीं अशी मागणीय केली.
गांवांत जायते मेगा प्रोजेक्ट्स येतात. तांकां वाट करून दिवपा खातीर डोंगर कांपणी नेटान चालू आसा. हाका लागून सैमीक झरी शेणल्यात. झाडां, झिली कापिल्ल्यान गांवाचो सैम काबार जाला. सगले कडेन रखरख दिसता. हाचेरूय ग्रामस्थांनी पंचायतीचें लक्ष ओडलें. व्हड इमारती, प्रोजेक्ट्स हांकां गांवांत सुवात नाकाच. नगर नियोजन खातें तांकां परवानगी दिता जाल्यार हाचो आमी खर निशेध करतात. हाचेर कारवाय करूंक ना जाल्यार उपोशणाचो मार्ग आपणायतले, अशीय शिटकावणी गांवकारांनी दिली.
ह्या वेळार सरपंच अब्दुल नायक हांणी बेकायदेशीर गजालींक कोणे परवाने दिल्यात जाल्यार ते रद्द करून फकत ग्रामस्थांच्या बर्याचें आनी कायदेशीर आशिल्लेच प्रकल्प हाडटले अशी गवाय दिली.
सचिवांची बदली करपाची मागणी
पंचायतीचे सचीव योग्य तरेन सहकार्य करिनाशिल्ल्याचें ग्रामस्थांनी पंचायत मंडळाचे नदरेक हाडून दिलें. फाटल्या कांय काळां दोन हजारां परस चड झाडांची कत्तल जाल्या. दोंगर कापणेकूय परवानगी दिल्या. ह्या प्रकल्पांक पंचायतीच्या सचिवाचें पूर्ण सहकार्य आशिल्ल्याचो गंभीर आरोप ह्या वेळार थळावे नागरीक नरेश कोरगांवकार आनी थळाव्यांनी ग्रामसभेंत केलो. तशेंच तांचे बदलीची खर मागणी केली.
मजगतीं, गांवांत सध्या सुरू आशिल्ल्या आनी प्रस्तावीत आशिल्ल्या जायत्या उदरगतीच्या कामांचेर चर्चा जाली. कोरगांव ते पेडणें रस्तो फोंडकुलांनी भरला. संबंदीत अधिकारी तशेंच आमदारांचीय हाचे कडेन आडनदर जाता. थळाव्यांक हाचो व्हड फटको बसता. हाचेर तोडगो काडप गरजेचें. असोय एक मुद्दो ग्रामस्थांनी हजर केलो.
मजगतीं, बेगीनूच हाचेर तोडगो काडटले, अशी हमी सरपंच अब्दुल नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
