भांगरभूंय | प्रतिनिधी
पेडणें: कोरगांव पंचायत वाठारांत सर्व्हे क्रमांक २३९/० त व्हडा प्रमाणांत सैमीक आवरण आसा. आतां तें नश्ट करून थंय राखणे वणच बांदपाचें काम सुरू जालां. बांधकाम करतना रान खात्याची परवानगी घेनासतना झाडां मारून उडयिल्लीं. ह्या वाठारांत सैमीक स्रोत, झरे, व्हाळ तशेंच रानवटी जनावरां आनी विंगड विंगड तरेचीं वखदी झाडां हे वणटीच्या बांदकामा वेळार आनी रस्तो रूंद करतना नश्ट जाल्यांत. मुखेल रस्त्या वेल्यान सुमार स किलोमीटर अंतराचेर आशिल्ल्या दोंगरार हो प्रकार सुरू आसा. हे विशीं जायते फावटीं कागाळी करून लेगीत सरकारी यंत्रणेक जाग येवंक ना, अशें समाजीक कार्यकर्ते राहुल भगत हांणी पत्रकार परिशदेंत सांगलें.
आपणें हे विशीं कोरगांव पंचायती कडेन कागाळूय दिली. वट्ट चार खात्यां कडेन आपणें कागाळी दिल्यात. मात हे कागाळी कडेन मुद्दम आडनदर करतात, असो गंभीर आरोपूय भगत हांणी केलो. वणत बांदून रस्तोय बांदलो. राखणे वणटी खातीर कोरगांव पंचायत मंडळाची परवानगी आसा. मात ताका टीसीपी, उदकास्रोत खातें तशेंच वनखात्याची परवानगी घेवंक ना. ताका लागून आपणें चारुय विभागा कडेन कागाळी केल्यो. पेडणें उपजिल्लोधिकारी, कोरगांव पंचायत, रान खातें तशेंच टीसीपी कडेन ह्यो कागाळी केल्यात. मात उदकास्रोत खातें सोडून हे विशीं कोणेंच हालचाली करूंक ना, अशी म्हायती ह्या वेळार राहुल भगत हांणी दिली.
आपणें परवानगी दिवंक ना: सरपंच अब्दुल करीम नायक
हे विशीं कोरगांवचे सरपंच अब्दुल करीम नायक हांचे कडेन संपर्क केलो तेन्ना तांणी सांगलें, आपूण तेन्ना सरपंच नाशिल्लों. कंपावंडाचो प्रस्ताव बसकेंत आयिल्लो तिकाय हांव हजर नाशिल्लों. ताका लागून हे गजालीक हांव जापसालदार ना. राहुल भगत हे म्हज्या प्रभागांतूच रावतात. तांकां म्हजे आड पंचायत वेंचणूक लढपाची आसा. देखून ते विवीध खटले दाखल करीत आसात. भगत हांणी ज्यो कागाळी चार खातीं, विभागां कडेन दिल्यात, तांचें कसलेच तरेचें पत्र पंचायतीक अजून तरी येवंक ना. तें आयिल्लें जाल्यार ताचेर हांव स्वता कारवाय करपाचों. मात तसो कसलेच तरेचो अहवाल, पत्र येवंक नाशिल्ल्यान पंचायत ताचेर कांयच करपाक शकना, अशें अब्दुल करीम नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
