भांगरभूंय | प्रतिनिधी
पेडणे: पुलीस आनी घुंवळे वखदां नियंत्रण विभाग हांच्या जोड पंगडान केल्ले कारवायेंत कोरगांवां (पेठवाडो) सुमार एक कोटी रुपयांचें मोलाचें ड्रग्ज जप्त केलें. ह्या प्रकरणांत इना वोल्कोवा ह्या बेलारुसच्या नागरिकाक अटक केल्या.
९ ते १० डिसेंबर २०२५ मजगतीं ही कारवाय केली. इना वोल्कोवा हिच्या ताब्यांतल्यान ड्रग्ज आनी ते तयार करपा खातीर लागपी सामान व्हडा प्रमाणांत जप्त केलें.
जप्त केल्ल्या मालांत ९३३ ग्रॅम वजनाचें, डीएमटी लिक्वीड आनी ३८८ ग्रॅम वजनाचे द्रव स्वरूपांतल्या डीएमटी हाचो आसपाव आसा. तशेंच, ड्रग्ज काडपा खातीर वापरपी ४१ ग्रॅम कच्च्या लाकडाच्यो साली आनी ८ ग्रॅम वजनाचे सुकयिल्ले मशरूम्स (हाचो उपेग डीएमटी द्रवांत करता असो दुबाव आसा.) जप्त केले.
ह्या प्रकरणांत एनसीबीन एनडीपीएस कायद्या खाला गुन्यांव नोंद करून इना वोल्कोवा (रा. पेठवाडो, कोरगांव) हिका काल १० डिसेंबराक अटक केली. एनसीबी, पर्वरेचे पुलीस निरीक्षक मोहन राणे हे ह्या प्रकरणाचो फुडें तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
