भांगरभूंय | प्रतिनिधी
पेडणेंः गोंयांत बेकायदेशीर रितीन रावपी परदेशी नागरिकां आड पेडणें पुलिसांनी आपली मोहीम चड खर केल्या. शेनवारा मध्यान रातीं केल्ल्या कारवायेंत बांगलादेशी नागरिकाक अटक केल्या. दुबावीत कसलेच वैध कागदपत्र नासतना कोरगांव-पेडणें रावतालो.
मेळिल्ले म्हायती प्रमाण, शेनवारा 31 जानेवारीक मध्यान रातीं सुमार 12:25 वरांचेर पेडणें पुलिसांक कोरगांव पेठेचावाडो वाठारांत एक दुबावीत मनीस रावता अशी म्हायती मेळ्ळी. हे म्हायतीचेर आदारून पुलिसांनी रोखडेंच थंय वचून चवकशी केली. संबंदीत व्यक्ती कडेन भारतांत रावपा खातीर पासपोर्ट, व्हिसा वा हेर खंयचोय वैध प्रवास दस्तावेज नाशिल्ल्याचे दिसून आयलें.
अब्दुर रहमान (34) अशें अटक केल्ल्या दुबाविताचे नांव आसा. तो मूळ बांगलादेशांतल्या गोपाळगंजचो आनी सध्या पेडणेंच्या कोरगांव वाठारांतल्या पेठेचोवाडो हांगा भाड्याच्या कुडींत रावतालो. कसलीच अधिकृत परवानगी नासतना दुबावितान भारतीय शिम हुपून गोंयांत प्रवास केलो.
ह्या प्रकरणांत पेडणें पुलिसांनी गुन्यांव नोंद केलो. उत्तर गोंय जिल्लो पुलीस अधीक्षक आनी हेर वरिश्ठ अधिकाऱ्यांच्या मार्गदर्शना खाला ही कारवाय केली. पुलीस निरिक्षक नितीन विष्णुदास हलर्णकार हांच्या देखरेखी खाला उपनिरिक्षक साहिल शांताराम नायक ह्या प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
