भांगरभूंय | प्रतिनिधी
पंच अब्दुल नायकाचेर गुन्यांव नोंद, कारवायेची मागणी
पेडणें: कोरगांव पंचायत वाठारांत कोनाडे सर्व्हे नं. १८९/१ तलें अवैध बांधकाम नियमीत करपा खातीर बनावट उदकाचें मिटर बिल सादर करून प्रशासनाक फटयिल्ले खातीर दुबावीत पंच वांगडी अब्दुल करीम यासीन नायक हांचे आड पेडणें पुलीस स्टेशनांत एफआयआर (क्र. ०६/२०२६) नोंद जाल्ली. उपरांत आयज राहुल भगत आनी उगम प्रभुदेसाय हांणी पत्रकार परिशद घेवन अब्दुल करीम नायक हांचेर कारवाय करपाची मागणी केली.
हे पत्रकार परिशदेंत उलयतना राहुल भगत हांणी सांदलें, हें बांदकाम CRZ-III NDZ (No Development Zone) तशेंच मँग्रोव्ह बफर झोनांत येता, जंय खंयचेंय बांदकाम वा ताचें नियमितीकरण कायद्यान अनुमत ना. ह्या प्रकरणांत गोवा सीआरझेड प्राधिकरणा कडल्यान कारणां दाखयात नोटीस जारीक केल्या.
भगत हांणी स्पश्ट केलें, बोगस उदकाचें मिटर बील हे सीआरझेड नोटीस येवचे पयलींच नियमितीकरणाच्या अर्जा वांगडा जोडिल्लें. त्या आदारार उपजिल्लोधिकारी कार्यालयाची दिकाभूल करून अवैध बांधकामाचें नियमितीकरण करून घेतलें. सीआरझेड आनी मँग्रोव्ह संरक्षीत क्षेत्रात नियमितीकरण करपाक मेळना, हें स्पश्ट आसतनाय ही प्रक्रिया मुखार व्हेल्ल्यान उपजिल्लोधिकारी कार्यालयाची भुमिकाय गंभीर तपासणेक पात्र आसा, अशें तांणी नमूद केलें.
तशेंच ही सदर मालमत्ता ही एका परस चड धनयांची आशिल्ल्यान सगल्या संबंदीत धनयांनी संमती घेनासतना नियमितीकरणा खातीर अर्ज केलो. जो कायद्याच्या आनी प्रशासकीय नेमां आड आशिल्ल्याचेंय राहुल भगत हांणी सांगलें.
पत्रकार परिशदेचे निमाणे कडेन दोगांनीय एफआयआर नोंद जाल्ल्यान आतां पुलीस प्रशासनान बेगोबेग खोलायेन तपास करून आरोपी पंच वांगडी अब्दुल करीम यासीन नायक हांकां अटक करची, तशेंच प्रकरणांतल्या सगल्या जापसालदार मनशांचेर कायद्या प्रमाण खर कारवाय करची, अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
