भांगरभूंय | प्रतिनिधी
जे धर्तरेचेर हांव जीण सारतां ती निवळ, नितळ उरची, पर्यावरण पाचव्याचार झाडांनी नटचें, सैम सोबीत गिरेस्तकायेन हांसचें, वाठार निवळ नितळ उरचो आनी नितळसाणेची चकचकसाण सगळ्याक पातळची हें म्हजें सपन पुराय जावचें अशें म्हाका सदांच दिसता.
आयज हे भुंयेक एक महाभयंकर कीड लागल्या. आनी ती म्हळ्यार कचरो. देवान आमकां सोबीत सुंदर सैम दिलां आनी तो आमी सांबाळपाक जाय. पर्यावरण आनी नितळसाण ह्यो एकाच नाण्याच्यो दोन बाजू. नितळसाण दवरली आनी कचर्याचो विलो बरे तरेन केली जाल्यार हमखास पर्यावरण बरें नितळ उरतलें. मनशाचे जिणेंत नितळसाणेक भोवच म्हत्व आसा. कचरो, धुल्ल, दाग, घाण पयस करप म्हळ्यारूच नितळसाण. जण एकल्यान आपलें घर, वाठार, गांव, तालुको, राज्य, देश निवळ दवरलो जाल्यार पुराय संवसार नितळ जातलो. नितळसाणेचें सपन गाडगेबाबा, महात्मा गांधी अशा कितल्याश्याच म्हापुरसांनी पळयल्लें. आयज हें सपन आमचे भौ. प्रधानमंत्री नरेंद्र मोदी लेगीत पळयतात. जर जण एकल्यान हाचेर पावल उखल्लें जाल्यार ‘स्वच्छ भारत अभियान’ अमलांत हाडप पयस ना.
हाचे खातीर आपूण कितें करता? हातूंत आपलो वांटो कितपत आसा? हाचे खातीर आपूण कितें करूंक शकता? ह्या प्रस्नांचेर विचार केलो जाल्यार कचर्याच्या प्रस्नाचो सुटावो जावं येता. म्हाका तर दिसता दर एका नागरिकान आपलो वाठार निवळ करपाक आपलें योगदान दिवचें. घरगुती कोयराचो योग्य असो विलो लावचो. घरगुती कोयर घरा भायर, दुरगा भायर उडयलो आनी कचर्याची विल्लेवाट लायली म्हळ्यार चुकीचें थारतलें. घरगुती कोयर मेळत थंय उडयल्यार वाठार घाणयारो जाता. थंय किडे, जंतू, जळारां जावन लोकांक मलेरिया, चिकनगुनीया, डेंगू ह्या सारकीं भिरांकूळ दुयेंसां जावन मरण लेगीत येता.
हीं दुयेसां पातळपाक नाका जाल्यार कचरो बरे तरेन हाताळपाक जाय. सुको आनी ओलो कोयर फाव त्या कासांनी घालूंक जाय. ओल्या कोयराचें सारें करून भाटांनी, पोरसांनी आनी कुळागरांनी घालूंक जाय. सुको कोयर बर्या तरेन विस्कळीत करूंक जाय. प्लास्टीक बाटल्यो, ट्युब लायटी, मोडिल्लो खेळ, इबाडिल्लीं यंत्रां सारकीं हाताळपाक जाय. बस स्थानकां, बाजार, रस्ते, विमानतळ ह्या सारके भौशीक जागे नितळ दवरप सामकें गरजेचें. कचर्याचो विलो, नितळसाणेचेर भाशणां, व्याख्यानां, अभियानां राबोवप गरजेचेंच पूण त्या वाटेन वावुरपय तितलेच गरजेचें. म्युन्सिपालिटी, पंचायती हे दिकेन वावुरतात हें हांव न्हयकारूंक शकना पूण तो वावर खंय कमी जाता काय? हाचेर भर दिवंक जाय. मागीर वाडटे लोकसंख्येक लागून जायते प्रस्न उप्रासल्यात. आमी जायत्यो भिरांकूळ वस्तू वापरतात. प्लास्टीका सारको देंवचार सगळ्याक पातळ्ळा. आमी प्लास्टीक कमीत कमी वापरूंक जाय. प्लास्टीक पिशवी वापरपा परस कपड्याची वा कागदाची पिशवी वापरपाक जाय. प्लास्टीक आयदनां वाट्याचीं स्टिल, तांबे, पितूळ ह्या सारकीं आयदनां वापरूंक जाय. 4 R म्हळ्यार Reduce, Reuse, Recycle आनी recover हीं तत्वां आपणावंक जाय.
जबाबदार मनशानी आनी समाज सेवी संस्थांनी प्लास्टीक सारको कोयर पातळचो न्हय हाचेर खबरदारी घेवंक जाय.
लावया विलो कोयराचो
करया उद्दार देशाचो
प्लास्टीक हटावाचेर घालया भर
ना लागची आमच्या देशाक कोणाचीच सर
फुडाकार जण एकल्याचो
सर्ग जातलो निसर्गाचो
कचर्याची समस्या पयस करपाक जण एकल्यान मोख दवरपाक जाय कारण “nature does not give rewards nor punishments it only shows consequences.” म्हणल्यार आमी अशीच वागत रावल्यार सैमाचो प्रकोप आमकां एक दीस सोंसचो पडटलो.
अनुश्का साकोर्डेकार
यत्ता धावी, द न्यु एज्युकेशनल
इन्स्टिट्यूट, कुडचडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
