कोयर वेवस्थापनांत शिस्त येवची

भांगरभूंय | प्रतिनिधी

कि तें अवस्था जाल्या आसतली साळगांव कोयर वेवस्थापन प्रकल्पाची?
सगल्या केंद्रीय मंत्र्यांनी, राज्या- राज्यांच्या मुख्यमंत्र्यांनीच न्हय जाल्यार प्रधानमंत्र्यांनी लेगीत पळोवपा सारको उरला व्हय तो प्रकल्प? आदले मुख्यमंत्री लक्ष्मीकांतबाब पार्सेकार पावले आसत व्हय साळगांवां दोंगुल्लेर ह्या दिसांनी तांच्या शाळा, म्हाविद्यालयाच्या विद्यार्थ्यां सयत? तसोच एक कोयर वेवस्थापन प्रकल्प मांदऱ्यां जावचो अशें तांकां दिसतलें. ते खातीर मुख्यमंत्र्यांक ते मेळ्ळे आसतले. मंत्रीमंडळ बदलाची भासाभास तांचे कडेन मुख्यमंत्री डाॅ. प्रमोद सावंत हांणी केल्या आसतलीच. तशें पार्सेकार सर तांचेंय गुरू. पंचायत खातें सांबाळटना पार्सेकार सरांनी केल्ली कोयर वेवस्थापन प्रकल्पा पासत सरकारी पयशांची येवजण आसा व्हय? ते येवजणेक बळगें दिवन कोयर वेवस्थापन खातें घटमूट केल्यार कोयराचो विलो लावपाच्या वावरांतय शिस्त येतली. प्रकल्प बांदले म्हणून जावचें ना कोयराचो सारको विलो लावचो हे खातीर पंचायत ते नगरपालिकांक नवे ट्रक, मनीसबळ जाय. कोयर वेवस्थापन मंत्री बाबूश मोंसेरात साळगांव, कुडचड्यार, कुंडय कोयर वेवस्थापन प्रकल्पाची भोंवडी करतात. आमदार म्हूण स्मार्ट सिटीच्या मुखेल कार्यकारी अधिकाऱ्यांक (सीईओ) घेवन तांणी पणजे भोंवचेंच.
पयल्या कोयर वेवस्थापन प्रकल्पाची बुन्याद साळगांवां घालतना विरोध जालो. तो मोडून काडपाक आदले मुख्यमंत्री मनोहर पर्रीकार हांचे वांगडा आमदार मायकल लोबो, आदले आमदार दिलीप परुळेकार हांकां रावचें पडलें. मतदारसंघातले लोक बोवाळ घालताले, मोर्चा काडपाची भास करपाक लागले तेन्ना आमदार तांचे बराबरीन आशिल्ले. आर्किटेक्ट, इंजिनियरांक बराबरीन बसोवन आमदारांनी लोकांक समजायल्यार कोयर वेवस्थापन प्रकल्प फुडें वचूंक सोदता हें लोबो, परुळेकार हांणी दाखोवन दिलां. आयज तेच तिसवाडी कोयर वेवस्थापन प्रकल्पाची बायंगिणीची भूंय दाखयत व्हय? तिसवाडी कोयर वेवस्थापन प्रकल्पा खातीर अर्थीक तजवीज पयल्या स्मार्ट सिटीचे येवजणेंत आसा. बुन्यादी फातर नासलो तरी येवजणेची फायल आसतली.
कोयर वेवस्थापन खात्या लागीं त्यो फायली आसपाक जाय. तिसवाडी कोयर वेवस्थापन प्रकल्प 2026 डिसेंबर मेरेन जातलोच ही मोख सरकारान दवरची.
कोयर वेवस्थापन प्रकल्प बांदले पूण नागरी शिस्त नागरिकांक शिकोवपाक नगरसेवक उणे पडटात. चडशे आमदार जावपाचीं सपनां पळयत रावतात. नगरसेवकांक, नगराध्यक्षांक शार उदरगत मंत्र्यांनी धांवडावचें पडटलें. कोयर वेवस्थापन मंत्र्यांक बराबर घेवन शार उदरगत मंत्र्यांक वावराक लावपा पासत मुख्यमंत्री बसका घेतले अशी आस्त आसा. तिसवाडी कोयर वेवस्थापना पासत चडावत पयसो केंद्र सरकारान दिवचो म्हूण फाटल्यान लागपाचो वावर खासदार सदानंद शेट तानावडे करुंक शकतात. साळगांव कोयर वेवस्थापन प्रकल्पाची तांक वाडोवप, मांदऱ्यां वा धारगळे नवो कोयर वेवस्थापन प्रकल्प जावचो हे खातीर तांणी पळोवणी करची.
कोयर वेवस्थापनांत सुक्या, ओल्या कोयरा बराबरीन सिमेंट काँक्रिटाचो कोयर, निर्माल्य, कपडे, जोतीं, बूट, गादयो, इलेक्ट्राॅनिक्स वस्ती वाडटात. एक घेतल्यार एक फुकट येवजणींचे ते परिणाम.
16 ते 18 तरेच्या कोयराचो विलो लावपा पासत वेवस्था करची पडटली, रस्त्यार कोयर उडोवप्यांक सीसीटीव्ही कॅमेरा धरतले ही शिटकावणी कार्नाव्हाल परेडींतल्यान मेळटा, अंदूंय मेळटली. बाणावले दर्यादेगेच्या वाठारांत वचत व्हय कोयर वेवस्थापन येवजण कार्नाव्हाल परेडींतल्यान.
पणजेंतलो कार्नाव्हाल ताळगांवांतल्या पंचायत वाठारांनी नव्या रस्त्यांचेर व्हरपाची येवजण जावची. स्मार्ट सिटींतल्यान पणजे लागसरचे पंचायतींतले रस्ते रुंद जाल्यात. म्हापालिका बसकेंत भासाभास केल्यार पणजे कार्नाव्हाल परेडीक नवो मार्ग कित्याक मेळचो न्हय? स्मार्ट सिटी खंय पावल्या, धांवपा पासत नवो मार्ग जाला हाचो नियाळ म्हापालिकेन घेवचो. नगरसेवकांक कोयर वेवस्थापन तांच्या वाड्यांनी जाता काय ना हाचो रिपोर्ट दिवपाक लायल्यार बोवाळ जातलो, बसका फुडें धुकलच्यो पडटल्यो. त्या बोवाळांत नवें नुस्त्या मार्केट आदल्या सूर्यनारायण मार्केटा वरी बांदून सुरूय जालें. नवो टाॅयलेट प्रकल्पय जाला ही म्हायती गाेंयच्या नगरसेवकांक दिवची.
गोंयच्या सगल्या नगरपालिका कामगारांची, नगरसेवकांची एकवटीत बसका घेवन बऱ्या कामकाजाची तोखणाय सरकारान करची.
कोयर वेवस्थापनांत शिस्त हाडपा पासत नगरसेवकांनी वाड्यावाड्यार नवे पंगड करचे पडटले. प्लास्टीक पोतयो नाका, प्लास्टीक बाटल्यो रस्त्यार उडोवच्यो न्हय ही म्हायती पर्यटकांक हाॅटेलांत भितर सरतना मोबायलार मेळची. बाटल्यो, दाट प्लास्टिकाच्यो, कपड्याच्यो पिंजिल्ल्यो पोतयो खंय उडोवच्यो तें एके वळींत सांगपाचो वावर पणजी म्हापालिकेन केल्यार भांगरभूंयचो तेंको आसतलो.
प्लास्टिकांत भांगर कांय नवें प्लास्टीक तयार जाता हाचो अभ्यास करपी गिन्यांनी आसतले. तांकां विचार महोत्सवांत फुडल्या वर्सा हाडचे पडटले. कोयर वेवस्थापनांत नागरिकांक वांटेकार करून घेतल्यार शिस्त येतली. व्हड शारांनी फ्लोटिंग (यो वच करपी, सेकंड होम घेवपी) नागरीक व्हड प्रमाणांत येतात, बांदकामा निमतान, फेस्तां, जात्रे खातीर. फेस्त, वेवस्थापनय सांबाळपी विदेशांतले गोंयकार आसात. तांकांय कोयर वेवस्थापन करपाक शिकोवचें पडटलें. जार्दिन्यांनी पुरुमेंतांचेच न्हय कसलेंच फेस्त नाका असो थाराव कितल्या नगरपालिकांनी घेतला?
कोयर वेवस्थापनांतल्यान झरी, बांयचें उदक प्रदुशीत जालां व्हय? तशो कागाळी साळगांवचे आमदार करतात जाल्यार विज्ञान तंत्रज्ञान, पर्यावरण मंत्र्यांनी साळगांवां वच्चें. प्रदुशण आळाबंदा हाडपाक तंत्रगिन्यान मजत करुंक शकता. उंचेलें शिक्षण त्या विशयांत घेतिल्ले, अणभवी गुणेस्त, सकारात्मकतेन वावुरपी गोंयकार गिन्यांनी वाट (पर्याय, सोलुशन) सरकाराक दाखयतले.
विचारवंत, गिन्यांन्यांची, दोतोर, उद्देजकांच्यो समित्यो राजकी पक्षाच्या पांवड्यारय जातात पूण तांकां रस्ते, पासयेर भोंवपाक वगत आसना. तरणाट्यांक राजकारणांत हाडपाचे यत्न राजकी पक्ष करुंक लागल्यात. संतांक, साहित्यिकांक, खेळगड्यांक राजकारणांत येवचें दिसतलें, तांचे खातीर राज्यसभा आसा. राष्ट्रपती वरवीं गोंयच्या गुणेस्तांची नेमणूकय राज्यसभेर कित्याक जावची न्हय? कोयर वेवस्थापनांतल्यान नव्यो दोंगुल्ल्यो, दोंगुल्ल्यांनी बिल्डिंगो जाल्यात व्हय? पूल, रस्ते बांदपा पासत कोयराचो उपेग गोंयांत जाला, कोयरांतल्यान जार्दिन्यां देशांत जाल्यांत. त्या जार्दिन्यांक कवाडां करचीं, रातीं 8 वरां मेरेन तीं उक्तीं दवरचीं. नागरिकांक शिस्त शिकोवपाक, म्हायती दिवपाक त्या कवाडांचोय उपेग कसो करूं येता ते राखणेय सांगूक शकतात. राखण्यांची उलोवपाची भास कोंकणी, ते वरिश्ठांकय ती शिकोवंक शकतात. जशी उलयतात तशीच बरयल्यार शिस्त येतलीच, भासय तुमची आमची जातली, कोयर वेवस्थापन शिस्तीन जातलें.

सुहासिनी प्रभुगांवकार
9881099260