भांगरभूंय | प्रतिनिधी
बेगोबेग खारीज नितळ करपाची मागणी
पणजीः सांत इनीज खारीज परतून अडचणींत आयल्या. काकुलो मॉला लागसार प्लास्टीक कोयर आनी वॉटर हायसींथ ह्या वनस्पतींची व्हड प्रमाणांत वाड जाल्ल्यान ह्या उदकाचो प्रवाह आडखळून उरला. देखून वाठारांत घाणीचें साम्राज्य पातळ्ळां, आनी ह्या प्रकाराक लागून गंभीर दुयेंसां जावपाची भिरांत आसा.
सांत इनीज भौशीक बांदकाम खात्याच्या फाटल्यान सांत इनीज खारजाचो एक फांटो व्हांवता. पूण रस्त्यार आशिल्ल्या सांकवा कुशीक कांय म्हयन्यां पयलीं ल्हवू ल्हवू हायसींथ ही वनस्पत वाडपाक लागली आनी उपरांत तिणें पुराय खारजाक रेवाडो घालाे. ह्या कारणाक लागून खारजाचो प्रवाह आडखळ्ळा आनी प्रवाहा बराबर व्हांवून येवपी प्लास्टीक आनी कोयर सांकवा कुशीक सांचून उरता. आतां हो कोयर इतलो जाला की वनस्पतीचे वयर एक थर ह्या कोयराचो निर्माण जाला.
हें उदक आडखळून उरिल्ल्यान सरभोंवतणी घाण पातळ्ळ्या. कुशीक पसरे आशिल्ल्या वेवसायिकांची तकली ह्या कारणाक लागून जड जाता. पणजे म्हानगरपालिकेची वेंचणूक लागीं पावल्या अशें आसून लेगीत ही समस्या पालिकेक कित्याक दिसना, असो प्रस्न वेवसायीक करतात.
ही समस्या जाली म्हयनो भर तशीच आसा. पुराय उदकांत कोयर सांचून उरिल्ल्यान तशेंच सीवेजीचें उदक सोडप चालूच दवरिल्ल्यान हांगासर कोंड तयार जालां. ह्या कोंडांतल्यान 100 मिटर सुवाते भितर घाण वास येता आनी रस्त्यार उबे रावप लेगीत कुस्तार जालां, अशें वेवसायीक सुनील देविदास हांणी सांगलें.
ह्या सांठावन उरिल्ल्या उदकांत जळारांची पैदास जावपाक सुरवात जाल्या. परिस्थिती हाताभायर वचून डेंग्यू, मलेरिया ह्या सारकिल्ल्या दुयेंसांचो घात वाडपाची भिरांत जाल्या. ही परिस्थिती हाताभायर वच्चे पयलीं पालिकेन ही वनस्पती काडची आनी जो गाळ सांठून उरला तो बेगोबेग नितळ करचो, अशी मागणी देविदास हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
