भांगरभूंय | प्रतिनिधी
लेविन्सन मार्टीनः नेम तयार जावन पर्यावरण लुकसाण भरपाये खातीर दंड
पणजी: ज्यो पंचायती कोयर एकठांय करिनात वा कोयराचें वेवस्थापन करिनात तांचेर पर्यावरण लुकसाणेच्या भरपाये खातीर दंड घालतले. हे विशींचे नेम तयार जातले अशी म्हायती प्रदुशण नियंत्रण मंडळाचे अध्यक्ष लेविन्सन मार्टीन हांणी दिली.
पणजेंत आयोजीत केल्ले पत्रकार परिशदेंत ते उलयताले. ह्या वेळार प्रदुशण नियंत्रण मंडळाच्यो वांगडी सचीव डॉ. गीता नागवेंकार आनी हेर अधिकारी हाजीर आशिल्ले.
कोयर एकठांय केले उपरांत तो व्हरपाची वेवस्था आसा. साळगांव प्रकल्पांत कोयराचेर प्रक्रिया जाता. हाका लागून ज्यो पंचायती कोयर एकठांय करिनात तांचेर कारवाय करपाचो प्रस्ताव आसा, अशें लेविन्सन मार्टीन हांणी सांगलें.
संगिता विशीं 22 कागाळींचेर
कारवायेची प्रक्रिया सुरू
सप्टेंबर 2025 उपरांत प्रदुशण नियंत्रण मंडळा कडेन 600 कागाळी आयल्यात. हाचे पैकीं 22 कागाळींचेर कारवाय करपाची प्रक्रिया सुरू आसा. प्रदुशण नियंत्रण मंडळा कडल्यान 38 सुवातांचेर प्रदुशणाचे मेजमाप करपी यंत्रणा आसात. आवाजाचें प्रमाण वाडलें जाल्यार पयले खेपे 20 हजार, दुसरे खेपे 40 हजार आनी उपरांत 1 लाख रुपया दंड घालपाचो निर्णय मंडळान घेतला.
रातीं 10 उपरांत संगीत वाजोवपाचेर बंदी आसा. रातीं 10 उपरांत फक्त 15 दीस संगीत वाजोवपाची मेकळीक आसा. हे दीस पर्यावरण खात्यान निश्चीत केल्यात.
आवाजाचें प्रमाण वाडलें वा रातचें संगीत चालूच दवरलें जाल्यार 8956487938 ह्या नंबराचेर कॉल करून कागाळ नोंद करची. कागाळ नोंद जाले उपरांत मंडळा वतीन संबंदीत पुलीस आनी उपजिल्होधिकाऱ्याक कारवाये विशीं इमेल धाडटले.
चार सुवातांचेर प्रदुशणाचें प्रमाण मध्यम
2025 वर्सा वास्को, बायणा, दिवचल आनी कुंडय ह्या चार सुवातांचेर प्रदुशणाचें प्रमाण मध्यम स्वरुपाचें आसा. प्रदुशण नियंत्रण मंडळा वतीन 18 सुवातांचेर एर क्वालिटी इंडेक्साचे (एक्यूआय) मेजमाप जाता. ह्यो चार सुवाती सोडल्यो जाल्यार हेर 14 सुवातांचेर प्रदुशणाचें प्रमाण उणें आसा. वास्को, बायणा, दिवचल आनी कुंडय ह्या सुवातांचेर लेगीत प्रदुशणाचें प्रमाण भिरांती इतलें ना. तें मध्यम आसा, अशी म्हायती प्रदुशण नियंत्रण मंडळाचे अध्यक्ष लेविन्सन मार्टीन हांणी दिली.
ग्राफायट प्रदुशणाचेर उपाय काडटले
आमोण्यां पीग आयर्न प्रकल्पाक लागून बेतकी, खांडोळें आनी आमोण्यां ग्राफायटाचें कण सगल्याक पातळटात. हे कण कित्याक पातळटात हाचो सोद घेवन उपाय सोदपाची प्रक्रिया सुरू आसा, अशें लेविन्सन मार्टीन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
