भांगरभूंय | प्रतिनिधी
पूण दरवाड ना; फोंडें पालिकेचे बसकेंत घेतलो निर्णय
फोंडें: फोंडें पालिका वाठारांतलो घरा कणकणीं कोयर एकठांय करपी कंत्राटदाराक आनीक मुजतवाड दिवपाचो निर्णय काल (शुक्रारा) जाल्ले पालिका मंडळाचे बसकेंत घेतलो. नगराध्यक्ष रितेश नायक हांचे अध्यक्षताये खाला जाल्ले बसकेंत मुख्याधिकारी योगीराज गोसावी, पालिका निरिक्षक उदय देसाय आनी हेर नगरसेवक हाजीर आशिल्ले.
फोंडें पालिका मंडळाची वेंचणूक फुडल्या कांय म्हयन्यांत जावपाची आशिल्ल्यान कोयर एकठांय करपी कंत्राटदाराक मुजतवाड दिवपाचो निर्णय घेतला. बसकेंत जाल्ले चर्चे वेळार नगरसेवक प्रदीप नायक, शांताराम कोलवेंकार आनी व्यंकटेश नायक हांणी हे संबंदी नगरध्यक्ष रितेश नायक हांचे कडेन चर्चा करून निर्णय घेतला. फुडल्या वर्सा एप्रील वा मे म्हयन्यांत फोंडें पालिका मंडळाची वेंचणूक जावपाची आसा. ताका लागून उरिल्ल्या म्हयन्या खातीर कंत्राटदाराक मुजत वाड दिल्या.
हे विशीं अदीक म्हायती दितना नगराध्यक्ष रितेश नायक हांणी पालिका वाठारांतलो घरा कणकणीं कोयर एकठांय करपी कंत्राटदाराक मुजतवाड दिवपाचो निर्णय बसकेंत घेतला. पूण दरवाड करपाचो निर्णय घेतिल्लो ना. पालिका वेंचणूक लागीं पाविल्ल्यान हो निर्णय घेतला अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
