भांगरभूंय | प्रतिनिधी
फोंडें: भाटी काराय शिरोडेंच्या राजिया खान हे बायलेन आपल्या घरा मुखार कोयर उडोवपाची कागाळ केल्या. फाटल्या कांय म्हयन्यां सावन घराच्या मुखार उश्टें जेवण आनी कोयर उडयिल्ल्यान आमच्या कुटुंबाक बरेच त्रास सोंसचे पडटात अशें ती म्हणटा. तशेंच ह्या कोयराक लागून येवपी घाणीक लागून घरांत रावप कठीण जाल्ल्याचेंय तिणें सांगलें.
शिरोडा पंचायत आनी शिरोडा भलायकी केंद्रा कडेन लेगीत कागाळ केल्ली. मात तांकां कारवाय करपाक अपेस आयलें. आपल्या घरा कुशीक उडोवपी ह्या कोयरा विशीं पंचायतीन बेगोबे लक्ष घालचें, अणी मागणी तिणें केल्या.
कोयराची रास दिसानदीस वाडत आशिल्ल्यान तिच्या कुटुंबाचे भलायकेक धोको निर्माण जाला. इतलेंच न्हय तर हो वाठार गाय, सुण्यां सारकिल्ल्या हेडग्या जनावरांचें केंद्र जालां. हो कोयरान पर्यावरणाक आनीक दुशीत करपाक लागला. तशेंच जळारां, मूस घरांत घुसून जेवणाचेर बसून जेवण इबाडपाक लागल्यात. हाका लागून परिस्थिती सोंसपा भायली जाल्या.
हांगची कोयराची कूड नितळ करची, जमिल्लो कोयर काडून उडोवचो आनी भलायकेक आनीक धोको जावचो न्हय म्हणून वाठार सॅनिटायझ करचो अशी मागणी तिणें पंचायत अधिकार्यां कडेन केल्या. तशेंच फुडाराक नेमान कोयर एकठांय करपाची पद्दत आसची असोय उलो तिणें मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
