भांगरभूंय | प्रतिनिधी
फोंड्यां जाल्ले कार्यावळींत मुख्यमंत्र्यांचें सांगणें
फोंडें: नितळ गोंय दवरपा खातीर सरकार कोयराचो विलो कोट्यांनी रुपया खर्च करून लायता. पूण रस्त्याचे कुशीक व्हड प्रमाणांत कोयर उडयत आशिल्ल्यान ताचो पर्यटकांचेर परिणाम जाता. कोयराचे राशींक लागून पर्यटन मळार गंभीर परिणाम जावपाची शक्यताय आसा. हाका लागून गोंय नितळ दवरपा खातीर दरेकान जापसालदारकी स्विकारची अशें आवाहन मुख्यमंत्री डॉ. प्रमोद सावंत हांणी केलें.
फोंड्यां राजीव गांधी कला मंदिरांत बायलां आनी भुरगीं उदरगत खात्या वतीन आयोजीत केल्ल्या दुरुस्ती शिबिराचे कार्यावळींत मुख्यमंत्री डॉ. प्रमोद सावंत उलयताले.
ह्या वेळार उदका स्रोत मंत्री सुभाष शिरोडकार, पंचायत संचालक महादेव अरोंदेकार, नगराध्यक्ष विरेंद्र ढवळीकार, सरपंच नावेद तेहसीलदार, संचालक ज्योती देसाय, नगरसेवक रितेश नायक आनी हेर मानेस्त हाजीर आशिल्ले.
आदले मुख्यमंत्री मनोहर पर्रीकार हांणी सुरू केल्ल्या गृहआधार येवजणेचो लाव गोंयांतल्यो बायलो घेत आसात. फुडल्या म्हयन्या सावन गृहआधाराची रक्कम दर म्हयन्याचे 10 तारखेक चुकनासतना बायलांच्या बँक खात्यांत जमा करतले. सरकाराच्या विवीध येवजण्यांची सुरवात फोंडें मतदारसंघांतल्यान केल्यात ताचो लाव लोकांनी घेवपाची गरज मुख्यमंत्र्यांनी उक्तायली.
उदका स्रोत मंत्री सुभाष शिराडकार हांणी सिंगापूर प्रमाण गोंयांत पर्यटकांक आकर्शीत करपी प्रकल्प राबोवपाची गरज आसा. जाल्यारूच गोंयांत पर्यटन मळाक बरे दीस येवपाची शक्यताय आसा. गोंय साधन सुविधा मंडळा वतीन फाटल्या 25 वर्सांत खूबशे म्हत्वाचे प्रकल राबयल्यात, ताचो लाव लेगीत थळाव्या लोकांक तशेंच पर्यटकांक जायत आशिल्ल्याचें तांणी सांगलें.
ह्या वेळार सरपंच नावेद तेहसीलदार हांंणी आपले विचार उक्तायले. संचालक ज्योती देसाय हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
