भांगरभूंय | प्रतिनिधी
कोमुनिदाद समितींची राज्यपालां कडेन मागणी
पणजी : कोमुनिदाद जमनींतलीं अनधीकृत बांदकामां/ घरां अधीकृत करपाची तजवीज आशिल्ल्या दुरूस्ती विधेयकाक मान्यताय दिवची न्हय, अशी मागणी कोमुनीदाद समितीच्या वांगड्यांनी राज्यपाल पुसापती अशोक गजपती राजू हांचे कडेन केल्या. सभाघरांत संमत जाल्लें दुरूस्ती विधेयक घटनेच्या आदाराचेर ना. राज्यपालांनी विधेयकाचो अभ्यास करून विधेयक राष्ट्रपतीं कडेन धाडचें, अशी मागणी करमळी कोमुनिदादीचे अध्यक्ष वेंझी व्हिएगस आनी समितीच्या वांगड्यांनी केली.
करमळी कोमुनिदादीचे अध्यक्ष तशेंच आमदार वेंझी व्हिएगस, चिंचिणी कोमुनिदादचे अध्यक्ष आग्नेल फुर्ताद, गोलती कोमुनिदादीचे लुईस डिसोझा, ब्लेर रॉड्रिग्ज, सुकूर मिनेझिस हांणी राज्यपालांची भेट घेवन तांकां विधेयका आड निवेदन सादर केलें.
कोमुनीदाद जमनींतलीं अनधीकृत घरां अधीकृत करपाची तजवीज आशिल्लें लेजीस्लेटीव्ह डिप्लोमा दुरूस्ती विधेयक सभाघरांत ८ ऑगस्ट २०२५ दिसा संमत जालें. तें सर्वोच्च न्यायालय तशेंच हिमाचल प्रदेश उच्च न्यायालयाच्या निवाड्याक धरून ना. राज्यपालांनी संमत जाल्ल्या विधेयकाचो अभ्यास करून निर्णय घेवचो. विधेयक राष्ट्रपतीं कडेन धाडपाचो पर्याय राज्यपालां कडेन आसा. ‘हांव घटनेचे रक्षण करपा खातीर आसा. घटनेप्रमाण हांव निर्णय घेतलो’, अशी जाप राज्यपालांनी दिल्ल्याची म्हायती आमदार व्हिएगस हांणी दिली.
कोमुनिदाद जमनीतील अनधीकृत घरां अधीकृत करपा खातीर अर्जदाराक पयशें फारीक करचें पडटलें. ३०० मीटर परस चड आशिल्लो जागो ताका परत करचो पडटलो. कोमुनीदादीच्यो जमनी ह्यो सरकारच्यो न्हय. सरकार कोमुनिदाद जमनीं विशीं निर्णय घेवंक शकना. ह्यो जमनी समाजाच्यो (कम्युनिटी). कोमुनीदाद कोडाक धरून हें विधेयक ना, असो दावो कोमुनिदाद समितीच्या वांगड्यांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
