भांगरभूंय | प्रतिनिधी
-पुलीस, सर्वेक्षक आनी कर्मचाऱ्यां खेरीत सर्वेक्षण करप अशक्य
– सर्वेक्षणाक लागतलो तीन म्हयन्यांं परस चड काळ
पणजी : कोमुनिदादींतलीं घरां आनी अतिक्रमणांची म्हायती मुख्यमंत्र्यांनी मागयले उपरांत राज्यांतल्यो बऱ्योच कोमुनिदादी आतां जागे जाल्यात. कोमुनिदाद प्रशासकांनी कोमुनिदादीं कडेन म्हायती मागयले उपरांत आंकडेवारी नाशिल्ल्याचे कोमुनिदादींनी कळयले. अतिक्रमणां तशेंच घरांचो आंकडो कळपा खातीर सर्वेक्षणाची गरज आसा. सर्वेक्षण करपाक सध्या तरी मनीसबळ ना, अशें कोमुनिदादींनी कळयलां. उत्तर गोंय कोमुनिदाद प्रशासकाच्या कार्यालयांतल्यान ही म्हायती मेळ्ळी.
अतिक्रमणां तशेंच घरांची म्हायती दिवपा विशीं कोमुनिदाद प्रशासनान सगळ्या कोमुनिदादींक कळयलां. घरां कायदेशीर करपाचे घोशणे उपरांत उत्तर गोंयच्या सगळ्या कोमुनिदादीं कडेन म्हायती मागयल्या. कांय कोमुनिदादीं कडेन पोरणी म्हायती आसा. कांय कोमुनिदादीं कडेन म्हायती एकठांय केल्ली ना. तरी आसा ती म्हायती दिवपाचो पत्र वेव्हार जाला, अशें कोमुनिदाद प्रशासकांनी सांगलें.
कोमुनिदाद जमनीतलीं घरांं कायदेशीर करपाची घोशणा मुख्यमंंत्री डॉ. प्रमोद सावंंत हांंणी केल्या. तांंचे हे घोशणे उपरांंत विरोधी पक्षांंनी खर टिका केली. मतांं खातीर गोंंया भायल्या लोकांंचीं घरा कायदेशीर करपाचो हेत हाचे फाटल्यान आसा, असो आरोप काँग्रेस पक्षान केलो. हे घोशणे उपरांंत आगोंद तशेंच सेरूला कोमुनिदादींत घरांं आशिल्ल्या लोकांंनी मुख्यमंंत्र्यांंची भेट घेतली. घरांं कायदेशीर करपाची मागणी नेटान जायत आसा. हे मागणे खातीर मुख्यमंंत्र्यांंनी जिल्होधिकाऱ्यांं कडेन घरांंचो अहवाल मागला. घरांं विशींची म्हायती मेळोवपाची प्रक्रिया उत्तर गोंय कोमुनिदाद प्रशासकांनी सुरू केल्या. कोमुनिदादीं कडेन घरांं विशींची ठोस अशी म्हायती नाशिल्ल्यान आडखळ वाडल्या.
कोमुनिदाद जमनीतलीं घरांं कायदेशीर करपा खातीर येत्या शियाळ्यां अधिवेशनांत कायदो दुरुस्ती जातली, अशें आस्वासन मुख्यमंंत्री डॉ. प्रमोद सावंंत हांंणी दिलांं. अॅडव्होकेट जनरलाचो सल्लो घेवन दुरुस्ती विधेयक तयार जातलें, अशें मुख्यमंंत्र्यांंनी स्पश्ट केलांं.
————
सर्वेक्षणाची गरज
कोमुनिदादीच्या जमनींत घरां कितलीं आसात, अतिक्रमणां कितलीं जाल्यात, हे कळपा खातीर सर्वेक्षणाची गरज आसा. सर्वेक्षण केले खेरीत अतिक्रमणांची म्हायती दिवप शक्य जावचे ना. घरांची जी नोंद आसा ताचे परस प्रत्यक्षांत कितलीशींच घरां चड आसतली, अशें कोमुनिदादीच्या एका वांगड्यान सांगलें. घरां तशेंच अतिक्रमणांचो आंकडो कळपा खातीर सर्वेक्षण करपाची गरज आसा. कोमुनिदाद प्रशासकांक लेगीत आमी तशे कळयलां, अशें तांणी सांगलें. तशेंच मूळ गोंयकारांची घरां कितलीं आसात आनी गोंया भायल्यांची कितलीं घरां आसात, हाची आंकडेवारी ना. सर्वेक्षण केले उपरांत गोंयकार वा भायल्या लोकांच्या घरांची म्हायती मेळप शक्य आसा.
सर्वेक्षणा खातीर सर्वेक्षक, पुलिसांची मागणी
सर्वेक्षण करपा खातीर कोमुनिदादी कडेन मनीसबळ ना. मान्यतायप्राप्त सर्वेक्षक ना. सर्वेक्षणा खातीर मनीसबळ उपलब्ध करून दिवपाची गरज आसा. तशेंच सर्वेक्षणाच्या कामांत लोक वा घरांच्या धनयां कडल्यान आडकाठी येवपाची शक्यताय आसा. ही गजाल मतीत धरून पुलीस संरक्षणाची गरज आसा. कोमुनिदाद समितीच्या वांगड्यांनी हे विशीं कोमुनिदाद प्रशासकां कडेन पत्र वेव्हार केला. अतिक्रमणां वा घरांचें सर्वेक्षण करपाक कोमुनिदादी सध्या तरी असमर्थ आसात, अशें कोमुनिदादीचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
