भांगरभूंय | प्रतिनिधी
मडगांव, फातोर्डा, नावेले आनी कुडतर्यां ‘म्हजें घर येवजणे’चें उक्तावण
मडगांव: गोंयच्या कोमुनिदाद समित्यांनी बांधकामां करतना आडावंक ना आनी आतां घरां कायदेशीर करून दितना विरोध करतात. तांकां न्यायालयांत वचपाक कोणें सांगलें? हाचे फाटल्यानूय विरोधक आसात. जीं घरां नियमीत करतात तीं गरजेच्या कराची रक्कम भरून नियमीत करतात. कोमुनिदाद समित्यांनीय गरजेची परवानगी दिवची, घराचो हक्क मेळपाक आडमेळीं निर्माण करचीं न्हय, असो उलो मुख्यमंत्री डॉ. प्रमोद सावंत हांणी मारलो.
मडगांवच्या रवींद्र भवनांत मडगांव, फातोर्डा, नावेले आनी कुडतरी मतदारसंघांत ‘म्हजें घर येवजणे’चें उक्तावण मुख्यमंत्र्यां हस्तुकीं जालें. ह्या वेळार भौशीक बांदकाम मंत्री दिगंबर कामत, आमदार उल्हास तुयेंकार, आमदार आलेक्स रेजिनाल्ड, नगराध्यक्ष दामू शिरोडकार आनी जिल्लो कार्यालयांतले अधिकारी हाजीर आशिल्ले. म्हजें घर ही येवजण गोंयकारांचीं घरां संरक्षीत करपा खातीर आनी सर्वसामान्यांच्या हक्काच्या घराचें सपन पुराय करपा खातीर आसा, अशें मुख्यमंत्र्यांनी सांगलें.
राज्यातले कुळ आनी मुंडकार सुवातेचो प्रस्न सोडोवपाचो निर्णय घेतले उपरांत लोकांच्या घरांचो हक्क दिवपी म्हजें घर ही येवजण व्हड आसा. फाटलीं कितलींशींच वर्सां दुसर्यांचे सुवातेवेलें मूळ गोंयकारांचें घरूय ताच्या हक्काचें जावंक नाशिल्लें. हे खातीर कायदो दुरुस्ती केल्ल्यान, कायदेशीर आडमेळीं येवचीं ना हाची काळजी घेतल्या. हे येवजणेक विधानसभेंत विरोध विरोधकांनी केल्लो, तांकां समजावपाचो यत्न केलो, मात तांची हे विशीं चर्चा करूंक ना. हे येवजणेची गरज विरोध करप्यांक ना, मात सामान्य लोकांक आसा, अशें तांणी मुखार म्हणलें.
जांचीं घरां फाटलीं कितलींशींच वर्सां जालीं दुसर्यांच्या जाग्यार आशिल्ल्यान तांकां हक्क मेळूंक ना. मनीस जिणेंत एकदांच घर बांदताआनी तें घर ताच्या नांवार नासल्यार ताका त्रास जातात. ताका बांदकाम मोडून उडोवपाची नोटीस आयल्यार तो आनीक त्रासांत पडटा. ताचें घर संरक्षीत करपा खातीर आनी घराचें सपन पुराय करपा खातीर, हक्क मेळचे खातीर म्हजें घर ही येवजण आसा. ही येवजण एकदांच लाव घेवपी आसा. २८ फेब्रुवारी २०१४ ह्यान पयलीं १५ वर्सां गोंयांत रावपी लोकांचींच घरां संरक्षीत जातलीं, अशें मुख्यमंत्र्यांनी सांगलें.
कांय विरोधक एक जाल्ल्याचें दाखयतात. हे विरोधक लोकांचीं घरां मोडपाक एक जाल्यात काय? हें तांणी सांगचें. हे येवजणेंत जात, धर्म हाचो कितेंच संबंद ना. फॉर्म घेतले उपरांत स म्हयन्यांनी लिवींग सर्टिफीकेट, प्रतिज्ञापत्र आनी हेर कागदपत्रां सयत अर्ज सादर करचो.
ह्यान पयलीं घरां दुरुस्तीचे अर्ज पालिकेंत, पंचायतींत मेळटले. ते खातीर सरकारान जाहीर केल्ल्या अभियंत्यां कडल्यान दुरुस्ती गरजेची आशिल्ल्याचें प्रमाणपत्र दिवचें पडटलें.
तशेंच घराचें पार्टीशन करपाचें आमूय पंचायत आनी पालिकेंतल्यान जातलें. सात दिसांनी पळोवणी आनी प्रक्रिया जातली. सचीव वा मुख्याधिकारी हांकां तें दिवचें पडटलें. बसका जावंक ना अशें कारण दिवपाक मेळचें ना, अशेंय मुख्यमंत्र्यांनी ह्या वेळार स्पश्ट केलें.
जांचें घर सरकारी सुवातेर, कोमुनिदाद वा खासगी सुवातेर आसा, तशेंच हाउसिंग बोर्डचे वादग्रस्त सुवातेर आशिल्ल्या घरांक हे येवजणेंतल्यान घराचो हक्क मेळटलो. दरेकल्या खातीर वेगळे फॉर्म आसतलें, अशें सांगलें.
साळगांवां जीं घरां मोडलीं तेन्ना सरकाराक दोश दिलो, मात ही कारवाय कोणाक लागून जाली हाची म्हायती दिवची. सरकाराक कोणाचींच घरां मोहपाचीं ना. हे खातीर समाजीक कार्यकर्ते, विरोधक हांणी केल्ल्यो कागाळी कारणीभूत आसात. तांकां प्रस्न विचारात. घराचें फॉर्मूय आपूण दिल्ल्यान घराच्या हक्काचें प्रमाणपत्रूय आपल्या हस्तकीं दितले, असो विस्वासूय मुख्यमंत्र्यांनी उक्तायलो.
बांधकाम मंत्री दिगंबर कामत हांणी सांगलें, सरकारची गरज ही गरीबांक आसता, गरिबांक न्हय. विकसीत भारत करपा खातीर केंद्र आनी राज्य सरकारान गरीब लोकांक दोळ्यां सामकार दवरून काम केलां. हातूंत कोणाचेरूच अन्याय जावचो ना. कांय फार्मां आतां वाट्टले. बाकिच्यांक मागीर फार्म दितले. जांणी हे येवजणेचेर टिका केली, विधानसभेंत चर्चाय करूंक ना, तेच आतां हे येवजणेचो लाव घेतात, हेंच हे येवजणेचें जैत. सगल्यांक हक्काचें घर मेळचें हो हे येवजणेचो हेतू अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
