भांगरभूंय | प्रतिनिधी
28 फेब्रुवारी 2014 आदल्या घरांक मान्यताय
गोवा लेजिस्लेटिव्ह दुरुस्ती विधेयक सादर
मूळ कायद्यांत कलम 372 चो आस्पाव
भांगरभूंय । प्रतिनिधी
पणजी : कोमुनिदाद जमनी वयलीं 28 फेब्रुवारी 2014 आदलीं 300 मिटरां भितर जमनी वयलीं अनधिकृत घरां तशेंच बांदकामां अधिकृत करपाची तजवीज आशिल्लें गोवा लेजिस्टेटिव्ह डिप्लोमा दुरुस्ती विधेयक सभाघरांत सादर जालें. महसूलमंत्री बाबूश मोन्सेरात हांणी हें दुरुस्ती विधेयक सादर केलें.
मुख्यमंत्री डॉ. प्रमोद सावंत हांच्या फुडारपणा खालचे जाल्ले मंत्रीमंडळ बसकेंत ह्या विधेयकाक मान्यताय दिली. हे उपरांत हें विधेयक सभाघरांत मांडलें. मूळ कायद्यांत कलम 372 चो आस्पाव केला.
खंयचेय व्यक्तीन 28 फेब्रुवारी 2014 आदीं कोमुनिदाद जमनीर मान्यताय घेनासतना घर वा बांदकाम केलां जाल्यार तें अधिकृत करपाचो अधिकार सरकारी अधिकाऱ्याक आसतलो. जमनीची रकम सरकारान निश्चीत केल्ल्या दरा प्रमाण भरची पडटली.
बांदकाम वा घर मुंडकार कायद्या खाला येता जाल्यार वा जैव संवेदनसील वा खाजगी जमनींत आसत जाल्यार तें अधिकृत करपाक मेळचें ना. सेटलमेंट, इन्स्टिट्युशनल, उद्देगीक, पडीक जमनी वयलीं घरां अधिकृत जातलीं. घरां, बांदकामां वा भोंवतणची (सगल्या वटांनी) 2 मिटर जमीन घरधनयाक मेळटली. खंयचेय स्थितींत 300 मिटरां परस अदीक जमीन मेळची ना. 300 मिटरां परस अदीक जमीन अर्जदाराच्या ताब्यांत आसत जाल्यार ताणें अतिरिक्त जमीन कोमुनिदादीक परत करप गरजेचें आसा. ही जमीन परत दिले बगर अर्जाचेर निर्णय जावचो ना.
कायदो अस्तित्वांत आयले उपरांत 6 म्हयन्यांचे भितर अर्ज करप गरजेचें आसा. अर्ज आयले उपरांत 6 म्हयन्यां भितर संबंदीत अधिकाऱ्यान निर्णय घेवप गरजेचें आसा. कोमुनिदाद अटर्नीन मान्यताय दिवचे आदीं अर्जाचेर संबंदीत अधिकाऱ्याक विचार करपाक मेळचो ना. अर्जदाराक कोमुनिदादीचे मान्यताये खातीर कोमुनिदादी कडेन अर्ज करचो पडटलो. र्जाचेर कोमुनिदादीक 30 दिसांत निर्णय घेवचो पडटलो. मान्यताय दिवप शक्य नासल्यार 15 दिसांनी तशें अर्जदार आनी कोमुनिदाद प्रशासकाक कोमुनिदादीन कळोवचें पडटलें. अर्जाचेर कोमुनिदादीन 45 दिसां भितर निर्णय घेतलो ना जाल्यार अर्जदारान प्रशासका कडेन अर्ज करचो पडटलो. प्रशासक 30 दिसांनी कोमुनिदादीन मान्यताय दिल्ल्याचें प्रमाणपत्र दितलो.
कोमुनिदादीन मान्यताय दिली ना जाल्यार अर्जदाराक 30 दिसां भितर प्रशासका कडेन अपील करचें पडटलें. सुनावणी घेवन प्रशासकाक हाचेर 30 दिसांनी निर्णय घेवचो पडटलो. प्रशासकाचो निर्णय मान्य नासल्यार अर्जदाराक सरकारा कडेन दाद मागपाची मेकळीक आसा. कोमुनिदाद जमनींतलीं घरां अधिकृत जाले उपरांत तें 20 वर्सां मेरेन विकपाक मेळचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
