कोमुनिदाद जमनी गांवकारांच्यो

भांगरभूंय | प्रतिनिधी

अतिक्रमणां नियमीत करपाक कोमुनिदाद समितींचो विरोध

भांगरभूंय । प्रतिनिधी

म्हापशें : कोमुनिदाद जमनी गांवकारांच्यो मालकेच्यो आसात. गांवकार आनी कुळांचो कोमुनिदाद जमनीचेर अधिकार आसा. हे जमनींत हस्तक्षेप करपाचो गोंय सरकाराक कसलोच अधिकार ना. सरकार जर कोमुनिदाद जमनी वयलीं अतिक्रमणां नियमीत करपाचो यत्न केलो जाल्यार सर्वोच्च न्यायालायांत दाद मागपाचो निर्णय कोमुनिदाद समितींचे बसकेंत घेतला.

बुधवारा 16 जुलयाक सकाळीं आसगांव आनी नेरूलच्या कोमुनिदाद वेवस्थापन समिती वतीन आयोजीत बसकेंत वयलो थाराव मंजूर केलो. ‘कोमुनिदाद वाचयात आनी गोंय वाचयात’ ह्या बॅनरा खाला गोंयभरांतल्या कोमुनिदाद वेवस्थापन समितींक सरकाराच्या अतिक्रमण कायदेशीर करपाच्या प्रस्तावाक विरोध करचे खातीर उत्तर, दक्षीण आनी केंद्रीय विभागा खाल येवपी कोमुनिदादींनी सोमार 14 जुलय सावन ही बसकांची मोहीम सुरू केल्या.

ते प्रमाण बुधवारा आसगांव कोमुनिदाद कार्यालयांत अध्यक्ष रुईल्डो डिसोझा जाल्यार नेरूल कोमुनिदाद कार्यालयांत अध्यक्ष लक्ष्मी गोन्साल्वीस हांच्या अध्यक्षते खाला जागृती बसका जाली. ह्या वेळार बार्देस म्हाल तशेंच गोंयभरांतल्या कोमुनिदादींचे प्रतिनिधी हाजीर आशिल्ले.

कोमुनिदादी जमनी ह्यो कोमुनिदाद गांवकार आनी कुळांच्या मालकीच्यो आसात. सरकाराक सरकारी मालमत्ता नाशिल्ल्या ह्या जमनीं वयलीं अतिक्रमणां नियमीत करपाचो कसलोच अधिकार ना. कोमुनिदाद कोड कायद्यांत दुरुस्ती विधेयक हाडयल्यार अजून अतिक्रमणां आनीक जातलीं आनी नीज गोंयकार जे कायदेशीर मार्गान बांदकामां करतात तांचेर हो अन्याय थारतलो. ताका लागून आमचो सरकाराच्या निर्णयाक खर हरकत आसा, असोय थाराव बसकेंत मंजूर केलो.

आसगांव कोमुनिदाद अ‍ॅटर्नी नेल्सन फर्नांडीस हांणी सांगलें, कोमुनिदाद जमीन ही खाजगी मालमत्ता आसा. ह्या जमनींची कोमुनिदाद समित्यां कडल्यान संरक्षण करतात. सरकारान पयलीं आल्वारा आनी निर्वासीत मालमत्तांचो प्रस्न सोडोवचो. आमच्या कोमुनिदाद जमनींक हात लावचो न्हय. सरकाराच्या कोमुनिदाद जमनीं वयलीं अतिक्रमणां करपाच्या निर्णयाक आमी सर्वोच्च न्यायालयांत आव्हान दितले. प्रशासकीय यंत्रणा आदार करिनात हे खातीर कोमुनिदादीच्या जमनींचेर हीं अवैध्य बांदकामां वाडल्यांत. सरकार हाडपाक सोदता तो कायदो अस्तित्वांत आयलो जाल्यार कोमुनिदाद जमनींचें अस्तित्व सासणाचें काबार जातलें. सरकारान कोमुनिदादीचे जमनीं वयल्या अतिक्रमणांक संरक्षम दिवचे परस गोंयच्या हिता खातीर काम करचें, अशी मागणी फर्नांडीस हांणी केली.

न्यायालयांत लडो दिवपाचो उलो

आसगांव कोमुनिदादीन फक्त धर्मदाय उद्देशान शिक्षणीक संस्था आनी सरकारी प्रकल्पांकूच आपल्यो जमनी दिल्यात. सध्याचे स्थितींत कोमुनिदाद जमनीं विशीं सरकारान जो निर्णय घेतला, ताका आमचो खर विरोध आसा. सरकाराच्या ह्या धोरणाक गोंयांतल्या सगल्या समितींनी एकवटींत जावन विरोध तशेंच न्यायालयांत लडो दिवचो, अशें आसगांव कोमुनिदादीचे अध्यक्ष रुइल्डो डिसोझा हांणी सांगलें.