भांगरभूंय | प्रतिनिधी
भांगरभूंय । प्रतिनिधी
पणजीः फाटल्या पांच वर्सांत परवानगी घेनासतना 618 जाणांनी कोमुनिदादीचे जमनीर पक्की घरां बांदल्यांत. विधानसभा अधिवेशनांत आमदार क्रूज सिल्वा हांणी विचारिल्ल्या लेखी प्रस्नाक महसूल मंत्री बाबूश मोन्सेरात हांणी दिल्ले जापेंतले आंकडेवारींतल्यान ही गजाल उजवाडाक आयल्या.
फाटल्या पांच वर्सांत गोंयांतल्या कोमुनिदादीचे जमनीर परवानगी घेनासतना कितलीं घरां बांदल्यात? कोमुनिदाद जमनीर घडिल्ल्या बेकायदेशीर गजालीं विशीं कितल्यो कागाळी दाखल जाल्यात? सरकारान अश्या जमनीं वयलीं अनधिकृत बांदकामा नियमीत केल्यात? अशे प्रस्न आमदार क्रूज सिल्वा हांणी विचारिल्ले. ताका दिल्ले जापेंतल्यान महसूल मंत्री मोन्सेरात हांणी जी आंकडेवारी सादर केल्या, तातूंतल्लयान फाटल्या 5 वर्सांत गोंयांत अशीं 618 पक्कीं घरां बांदिल्ल्याचें दिसता.
कोमुनिदाद जमनीर परवानगी घेनासतना सगल्यांत चड घरां सांकवाळे बांदल्यांत. थंय अशीं 155 घरां आसात. ते उपरांत काणकोणां 136 घरां आसात. तशेंच चोडणां, म्हापश्यां, खोर्ली, बांदोड्यां, पंचवाडी, आजोशी, कुंडय, सावय वेरें, आसगांवां, गिरी, हणजूण्यां, कळंगूटे, हडफड्यां, शिरोड्यां, कोलवाळे, शिवोली, हळदोण्यां, म्हापश्यां, बस्तोड्यां, कामुर्ली, रेवोड्यां, शिरसय, सांगोल्ड्यां, नास्नोळें, निर्ला ह्या वाठारांनी अशीं पक्कीं घरां व्हड प्रमाणांत बांदिल्ल्याचें जापेंतल्यान कळटा.
मजगतीं, कोमुनिदाद जमनीर बांदिल्ल्या खूबश्या घरांचीं प्रकरणां न्यायालयांत पावल्यांत. न्यायालयाच्या आदेशा उपरांत अशीं घरां मोडटात लेगीत. तातूंत गोंयकारांच्या घरांचोय आस्पाव आसता. अशे जमनीर बांदिल्लीं घरां कायदेशीर करपाचो विचार सरकारान कांय म्हयन्यां आदीं केल्लो, पूण ताका विरोध जाल्ल्यान हो निर्णय प्रत्यक्षांत येवपाक शकलो ना.
सगळ्यांत चड पक्कीं घरां
सांकवाळ 155
काणकोण 136
शिरसय 31
हरवळें 28
म्हापशें 20
नास्नोळें 17
सेरुला 11
बेकायदेशीर गजालीं विशीं 61 कागाळी
फाटल्या पांच वर्सांत कोमुनिदाद जमनीर घडिल्ल्या बेकायदेशीर गजालीं विशीं कितल्यो कागाळी दाखल जाल्यात, ह्या प्रस्नाचेर जाप दितना मंत्री बाबूश मोन्सेरात हांणी सांगलें, पांच वर्सांत कोमुनिदाद जमनीर भराव घालप, दोंगर कातरप ह्या सारकिल्ल्यो 61 कागाळी खात्या कडेन दाखल जाल्यात. ह्या पांच वर्सांत गोंय सरकारान अशे जमनीर खंयच्याच बेकायदेशीर घरांक कायदेशीर करूंक ना, अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
