कोमुनिदाद, अल्वारा जमनीं वयल्या घरां खातीर बेगिनूच नवो कायदो

भांगरभूंय | प्रतिनिधी

मुख्यमंत्री : दिवचले प्रशासकी इमारती खातीर बुन्यादी फातर

भांगरभूंय । प्रतिनिधी

दिवचल : गोंय सरकारान 212 परस अदीक सेवा ऑनलायन केल्यात. कूळ मूंडकारांचे खटले जलद गतीन निकालात काडचे खातीर सरकारान विशेश यत्न केल्यात. गोंयांत कोमुनिदाद, अल्वारा जमनीर आशिल्लीं घरां कायदेशीर करपाक मेळचीं हे खातीर सरकार विशेश कायदो करतलें, अशी घोशणा मुख्यमंत्री डॉ. प्रमोद सावंत हांणी केली.

दिवचले सुमार 60 कोटी रुपया खर्च करून बांदपा आशिल्ली भोवउद्देशी प्रसासकीय इमारत तशेंच नियोजीत 600 सिटांची वेवस्था आशिल्ल्या कला भवना खातीर बुन्यादी फातर मुख्यमंत्री डॉ. सावंत हांचे हस्तुकीं बसयलो. ह्या वेळार ते उलयताले. तांचे वांगडा दिवचलचे आमदार डॉ. चंद्रकांत शेट्ये, मयेंचे आमदार प्रेमेंद्र शेट, नगराध्यक्ष विजयकुमार नाटेकार, आदले सभापती राजेश पाटणेकार, जिल्होधिकारी यशस्विनी बी., गोंय साधन सुविधा मंडळाचे वेवस्थापकी संचालक हरीश हडकोणकार, उपजिल्होधिकारी नेहाल तळावणेंकार, जिल्हो पंचायत अध्यक्ष शंकर चोडणकार आनी हेर अधिकारी हाजीर आशिल्ले.

दिवचलचो हो प्रकल्प इंटीग्रेटेड स्वरुपाचो पयलो प्रकल्प आसा. दिवचल आनी मयें मतदारसंघांतल्या लोकांक हे सुवातेर बरी सुविधा मेळटली. म्हालांतलीं खूबशीं सरकारी कार्यालयां भाड्याचे सुवातेंत आसात. ही इमारत बांदून जाले उपरांत तीं सगळीं हे सरकारी इमारतींत स्थलांतरीत जातलीं, अशें मुख्यमंत्र्यान सांगलें.

सरकार कायदेशीर प्रक्रिया करतना खूबश्यो सुदारणा करता. खूब जाणांनी घरां बांदल्यांत, मात सरकार कोणाचेंच घर मोडपाक सोदिना. अटल आसरा येवजणे खाला गोंयांत खूब घरां बांदतात. सरकार घरां मोडिना जाल्यार बांदून दिता, अशें मुख्यमंत्र्यान सांगलें. मामलेदार कार्यालयांत मुंडकारांचे खटले घेवन येतना थंय वकिलाक हाडचो न्हय, अधिकाऱ्यांनूच हो विशय सोडोवचो, अशी वेवस्था करतले, अशेंय तांणी सांगलें.

आतंकलादी हल्ल्यांत खूब जाणांचे बळी गेले. ताच्या बदल्यात भारतान पाकिस्तानांत घुसून तांकां तांची योग्यता दाखोवन दिली. हें करतना प्रधानमंत्री नरेंद्र मोदी हांच्या फुडारपणा खाला आमच्या सैन्यान केल्ली कामगिरी तोखणायेची आसा. त्या सगळ्या सैनिकांक सलाम. तशेंच हे कारवायेंत पांच सैनिकांक शहीद जावचें पडलें. तांकां मुख्यमंत्र्यान आर्गां ओंपलीं.

आमचो देश सुरक्षीत जावचो हे खातीर प्रधानमंत्री विशेश लक्ष दितात. भारत अर्थीक नदरेन खूब घटमूट आसात. सर्वधर्मसमभाव सांबाळटना देशद्रोही कारवाय करप्यांक मारून उडोवपाक खंयच फाटीं पडूंक नात. आमच्या दोशांतूच कांय देशद्रोही वावुरतात तांकां काबार करपाची गरज आसा, अशेंय मुख्यमंत्र्यान सांगलें.

आमदार डॉ. शेट्ये हांणी सांगलें, मुख्यमंत्री डॉ. प्रमोद सावंत हांचे मोलाचें योगदान मेळिल्ल्यानूच सोबीत, सुंदर असो प्रकल्प फुडल्या दोन वर्सांत साकार जातलो.

आमदार प्रेमेंद्र शेट हांणी सांगलें, खऱ्या अर्थान डबल इंजिनाचें भाजप सरकार लोकाभिमुख आसा. ज्लिहोधिकारी यशस्विनी बी. हांणी येवकार दिलो. तांणी आपल्या उलोवपांत सरकारी संकुला संबंदांत म्हायती दिली. उपजिल्होधिकारी तळवणकार हांणी उपकार मानले.