भांगरभूंय | प्रतिनिधी
ऍटर्नी, प्रतिनिधींचे २४ तारखेर जावपी बसकेंत फुडली कृती थारतली
पणजी : कोमुनिदाद जमिनींतलीं घरां आनी बांदकामां अधिकृत करपी विधेयकाक राज्यांतले भोवसंख्य कोमुनिदादींनी विरोध केलो आनी ह्या विधेयका आड राज्यपालांक निवेदन दितले. विधानसभेंत संमत जाल्ल्या विधेयकाक अनुसरून फुडले कृती निश्चीत करपा खातीर २४ ऑगस्टाक पर्वरे ऍटर्नी आनी कोमुनिदाद प्रतिनिधींची बसका जातली. बसकेंत कोमुनिदाद कायद्याचो अभ्यास करून फुडली कृती थारायतले. अशें करमळी कोमुनिदादीचे अध्यक्ष वेंझी व्हिएगस हांणी सांगलें.
राज्यांतल्या बर्याच कोमुनिदादींचे ऍटर्नी आनी प्रतिनिधींची पणजे बसका जाली. बसके उपरांत पत्रकार परिशदेंत वयली म्हायती दिली. जुआंव कोमुनिदादीचे ऍटर्नी जुआंव मिनेझीस, आसगांव कोमुनिदादचे ऍटर्नी नेल्सन फर्नांडीस आनी हेर कोमुनिदादींचे ऍटर्नी हजर आशिल्ले.
कोमुनिदादच्यो जमनी ह्यो सरकाराच्यो जमनी नात. कोमुनिदादींक विस्वासांत घेनासतना परस्पर विधेयक संमत करप अयोग्य आसा. कोमुनिदादी आदल्यो संस्था. राज्यांतल्यो सगल्यो कोमुनिदादी आयतारा पयलीं विधेयकाक विरोध करपी थाराव संमत करतल्यो. कोमुनिदादीची वेवस्थापकीय समिती हो थाराव घेतली. हो थाराव घेतले उपरांत २४ ऑगस्टाक पर्वरेच्या सेंट झेवियर रिसर्च सेंटरांत मॉन्सून फेलोशीप ही बसका जातली. हे बसकेंत कोमुनिदादींचे ऍटर्नी आनी प्रतिनिधी हजर आसतले. कोमुनिदाद कायदो आनी संमत जाल्ल्या विधेयका विशीं वांगड्यांक मार्गदर्शन करतले. तशेंच विधेयका आड फुडली कृती थारायतले. विधानसभेंत संमत जाल्ल्या विधेयकाक राज्यपालांनी मान्यताय दिवची न्हय, अशी मागणी करतले. राज्यपालांक हे विशीं निवेदन सादर करतले, अशें वेंझी व्हिएगस हांणी सांगलें.
कोमुनिदाद कायदो आनी विधानसभेंत संमत जाल्ल्या विधेयकाचेर राज्यांतले नामचेचे वकीलूय अभ्यास करतात, अशी म्हायती जुआंव कोमुनिदादीचे ऍटर्नी सुकूर मिनेझीस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
