भांगरभूंय | प्रतिनिधी
पणजी : कोमुनिदादींचें कामकाज सुरळीत चलोवपा खातीर पुराय वेळ प्रशासका सयत हेर कर्मचार्यांची भरती बेगीनूच जातली. कोमुनिदादींचें संगणकीकरण करपाची प्रक्रीयाय बेगीनूच सुरू जातली अशी म्हायती मुख्यमंत्री डॉ. प्रमोद सावंत हांणी दिली.
डॉ. सावंत हांणी मंत्रालयांत कोमुनिदाद समितीचे अध्यक्ष तशेंच हेर वांगड्यां कडेन विवीध विशयांचेर चर्चा केली. कोमुनिदादीच्यो समस्या मांडपाच्या हेतान ते मुख्यमंत्र्यांकडेन चर्चे खातीर आयिल्ले.
कोमुनिदादीं खातीर पुराय वेळ प्रशासकाची गरज आसा. कोमुनिदाद प्रशासकाकडेन हेर खात्यांचो ताबो आसता. सदचीं कागदपत्रां तशेंच कामकाज पळोवपा खातीर कर्मचार्यांचीय गरज आसता. कोमुनिदादीं खातीर कर्मचार्यांची भरती करतले. संगणक, प्रिंटर तशेंच हेर गरजेचें समान उपलब्ध करतले. कॉम्प्युटर ऑपरेटरची नेमणूक करतले. कोमुनिदादींचे कामकाज सुरळीत चलोवपा खातीर संगणकीकरण जावपाची गरज आसा. हाका लागून कागदपत्रां आनी हेर तपशील सुरक्षीत दवरप शक्य जातलें. कोमुनिदादींचें संगणकीकरण करपाची प्रक्रीया सुरू जातली, अशें डॉ. सावंत हांणी बसके उपरांत सांगलें.
उणो कर्मचारीवर्ग तशेंच साधनसुविधांचो उणाव, अशो समस्या कोमुनिदाद वांगड्यांनी मुख्यमंत्र्या मुखार बसकेंत मांडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
