भांगरभूंय | प्रतिनिधी
घरां अधिकृत करपी विधेयक संमत
28 फेब्रुवारी 2014 आदलीं घरां वाटावतलीं
80 टक्के गोंयकार आशिल्ल्याचो दावो
भांगरभूंय । प्रतिनिधी
पणजी : विरोधा उपरांत विरोधी आमदारांनी घातिल्ल्या बोवळांत 28 फेब्रुवारी 2014 आदलीं कोमुनिदाद जमनीर बांदिल्लीं घरां अधिकृत करपी दुरुस्ती विधेयक सभाघरांत संमत जालें. कोमुनिदाद जमनीर 80 टक्के घरां गोंयकारांचीं आसात. हीं घरां अधिकृत करचे खातिरूच ही दुरुस्ती केल्या, अशें मुख्यमंत्री डॉ. प्रमोद सावंत हांणी सांगलें.
महसूल मंत्री बाबूश मोन्सेरात हांणी हें विधेयक चर्चेक घेतले उपरांत विरोधी आमदारांनी विरोध केलो. आमदार कार्लोस फेरेरा, आमदार विरेश बोरकार, आमदार वेन्झी व्हिएगश, आमदार विजय सरदेसाय हांणी भाशणां वरवीं विरोध केलो. विरोधी आमदारांच्या भाशणां उपरांत मुख्यमंत्र्यान उलोवपाक सुरवात केली, तेन्ना विरोधी आमदारांनी सभापतीच्या आसना कडेन धांव घेतली. घोशणा दिवन तांणी सभाघरांत बसकण मारिल्ल्यान सभापतींनी पांच मिणटां खातीर कामकाज स्थगीत केलें. कामकाज परतून सुरू जाले उपरांत विरोधकांनी ‘आमकां नाका, आमकां नाका, भुमीपुत्र आमकां नाका’ अश्यो घोशणा दिवपाक सुरवात केली. ह्या घोशणांच्या बोवळांतूच महसूल मंत्री मोन्सेरात हांणी विधेयक संमत केलें.
घर म्हणल्यार निखट्यो वणटीं न्हय, जाल्यार तातूंत मनीस रावतात. आगोंदा 100 ते 150 कुटुंबांनी घरां वाटावपाची विनवणी आपले कडेन केल्ली. गोंयकारांनी कोमुनिदादीक पयशे फारीक करून घरां बांदल्यांत. तीं अधिकृत नाशिल्ल्यान घरांचेर सदांच संकश्ट आसा. तांकां घरांत सुखांत रावपाक मेळचें, हे खातीर हें विधेयक संमत केलां, अशें मुख्यमंत्री डॉ. सावंत हांणी सांगलें.
हें दुरुस्ती विधेयक मूळ गोंयकारांच्या हिताचें ना, बिगर गोंयकारांच्या हिताचें आसा, असो मुद्दो आमदार विरेश बोरकार हांणी मांडलो.
बांदकामां/ घरां अधिकृत करचे खातीर आदीं जांणी अर्ज करूंक नात तांकां नव्यान अर्ज करचे खातीर दोन वर्सांचो कालावधी दिवपाची तजवीज आसा. आदीं जांचे अर्ज भायर मारल्यात तांकांय अर्ज करचे खातीर दोन वर्सांचो कालावधी आसतलो. कोमुनिदाद जमनीर वा सरकारी जमनी वयलीं बांदकामां/ घरां अधिकृत करतले. हे खातीर सरकारान जमनी संबंदांत गरजेचो आदेश जारी करप गरजेचें आसा.
अनधिकृत बांदकाम दुरुस्ती विधेयकूय संमत
विरोधकांच्या बोवळांत अनधिकृत बांदकाम नियमन कायदो दुरुस्ती विधेयक सभाघरांत संमत जालें. पंचायत वाठारांत हाचे मुखार 500 चौखण मिटर जाल्यार नगरपालिका/ म्हापालिका वाठारांत 600 चौखण मिटरां मेरेनचें बांदकाम अधिकृत जातलें. अनधिकृत बांदकाम नियमन कायदो दुरुस्ती विधेयक सभाघरांत संमत जातलें. महसूल मंत्री बाबूश मोन्सेरात हांणी हें विधेयक सभाघरांत संमत करून घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
