भांगरभूंय | प्रतिनिधी
पणजी: कोमुनिदाद वांगड्यांची बसका घेवपा सयत समस्यांचेर चर्चा करून सरकाराक उपायां विशीं शिफारशी करपा खातीर सरकारान पांच वांगड्यांचो आयोग स्थापन केला. हो आयोग कोमुनिदाद समितींच्या वांगड्यां कडेन चर्चा करून सरकाराक उपाय येवजणेंचेर शिफारशी करतलो.
एस्टिफानो डिमेलो (पिळर्ण कोमुनिदाद अॅटर्नी), नेल्सन फर्नांडीस (आसगांव कोमुनिदाद अॅटर्नी), मार्वीन गोन्स्लावीस (बांबोळी कोमुनिदाद अॅटर्नी), सावियो कोरिया (मडगाव कोमुनिदाद अध्यक्ष), अविनाश तावारीस (कोलवें कोमुनिदाद अध्यक्ष) हे आयोगाचे वांगडी आसात.
सगळ्या कोमुनिदाद वांगड्यांची बसका 14 जानेवारी 2024 ह्या जातली. बसकेचें आयोजन करपाची जापसालदारी ह्या आयोगाचेर आसतली. कोमुनिदादीचे प्रस्न तशेंच आडखळी हांचेर चर्चा करून उपायां विशीं ही समिती सरकाराक शिफारशी करतली.
कोमुनिदाद संहिते प्रमाण दर पाच वर्सां उपरांत कोमुनिदाद वांगड्यांची परिशद आयोजित करची पडटा. हे परिशदेंत कोमुनिदादीचे वांगडी कोमुनिदादींच्यो समस्या तशेंच नव्या प्रस्तावांचेर चर्चा करतात. उपरांत आयोग शिफारशी वा समस्या सरकाराक सादर करतात. पाच वर्सां आदीं अशी परिशद जाल्ली, अशी म्हायती महसूल फांट्याच्या अधिकाऱ्यांनी दिली. बेकायदो घरां आनी अतिक्रमणांची समस्या सगळ्या कोमुनिदादींनी आसा. अतिक्रमणां तशेंच बेकायदो घरांची म्हायती खूबश्यां कोमुनिदादीं कडेन ना. सर्वेक्षण करपाची तयारी खूबश्यां कोमुनिदादींची आसा. सर्वेक्षण करतलो जाल्यार कोमुनिदादीं कडेन मनीसबळ ना. अतिक्रमणांचें सर्वेक्षण आनी बेकायदो घरां नियमीत करपा विशीं सध्या बरीच चर्चा आसा. हो विशय निश्चीतपणान चर्चेक येतलो. कोमुनिदाद जमनींतली घरां कायदेशीर करपाची घोशणा मुख्यमंत्री डॉ. प्रमोद सावंत हांणी केल्या. जिल्होधिकाऱ्यां कडेन सरकारान बेकायदो घरांचो आंकडो मागला. बेकायदो घरां तशेंच अतिक्रमणांची म्हायती कोमुनिदादीं कडेन नाशिल्ल्यान समस्या निर्माण जाल्या. परिशदेंत बेकायदो घरां, अतिक्रमणां तशेंच कोमुनिदाद कायदो दुरूस्तीचेर चर्चा जावपाची आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
