भांगरभूंय | प्रतिनिधी
डॉ. देविया राणेः मुख्यमंत्री डॉ. सावंत हांचे कडेन केल्ले चर्चेक सकारात्मक प्रतिसाद
भांगरभूंय । प्रतिनिधी
वाळपयः सत्तरी म्हाला खातीर रवीन्द्र भवन बांदपाची गरज आसा. हे खातीर फाटल्या कांय म्हयन्यांच्यान सेगीत यत्न चल्ल्यात. माऊस पंचायत वाठारांतल्या कोपाड्ड्यां जमनीची निवड केल्ली. मात ते खातीर कांय आडखळी निर्माण जाल्यात. तरी लेगीत थंय रवीन्द्र भवन बांदप हें आपलें सपन आसा. हे संबंदांत हालींच मुख्यमंत्री डॉ. प्रमोद सावंत हांची भेट घेवन कोपाड्ड्या पशुपैदास केंद्राचे तुशीक आशिल्ले सुवातेंत रवीन्द्र भवन बांदचे खातीर जमीन दिवपाची मागणी केल्या. हे खातीर मुख्यमंत्र्यान लेगीत सकारात्मक प्रतिसाद दिला. हे खातीर फुडल्या स म्हयन्यां भितर रवीन्द्र भवना खातीर बुन्यादी फातर बसयतले. ते उपरांत सत्तरी म्हाला खातीर गरजेचें आशिल्ल्या रवीन्द्र भवनाची गरज पुराय जातली, अशें आमदार डॉ. देविया राणे हांणी सांगलें.
ठाणे सत्तरीचे एके कार्यावळींत उलयतना डॉ. राणे हांणी ही म्हायती दिली. सत्तरी म्हालांत खूब प्रमाणांत कलाकार आसात. त्या कलाकारांक योग्य माची मेळप गरजेची आसा. अशे माचयेच्या माध्यमांतल्यान कलाकाराची उदरगत जाता. तांच्या पांखांनी विस्वासाचें बळ निर्माण जाता, अशेंय तांणी सांगलें. वाळपय शारा वांगडाच हेर साबार पंचायत वाठारांक रवीन्द्र भवनाचो फायदो जातलो. तेच खातीर तें बांदपाची आपली इत्सा आसा. साबार समाजीक उपक्रम ह्या रवीन्द्र भवन संकुलाच्या माध्यमांतल्यान विकसीत जावपाक शकतात. हालींच मुख्यमंत्री डॉ. सावंत हांचे वांगडा जाल्ले बसकेंत सत्तरी म्हाला खातीर रवीन्द्र भवन कितलें म्हत्वाचें आसा, हें तांकां पटोवन दिलें. त्या वेळार तांणी जमीन मेळोवन दिवपा संबंदांत सकारात्मक प्रतिसाद दिला. फुडल्या कांय दिसांनी हे संबंदांतल्या कागदोपत्री सोपस्कारांक गती मेळटली. स म्हयन्यां भितर रवीन्द्र भवना खातीर बुन्यादी फातर बसोवपाचो आपूण यत्न करतली. ह्या यत्नांक निश्चीत येस मेळटलें, अशें डॉ. राणे हांणी सांगलें.
सुर्ला इको टुरिझमाक चालना
सुर्लाच्या एका टुरिझमाच्या माध्यमांतल्यान रोजगार निर्मिती आनी थळाव्यांक अर्थीक चळवळींत वांटेकार करून घेवपाच्या प्रकल्पाचें जाता तितले बेगीन भुमीपुजन करपा खातीर यत्न चल्ल्यात. ह्या यत्नांक पांवड्या पांवड्यान येस मेळटा. ह्या वाठारांत चड तांकीची वीज पुरवण उपलब्ध करून दिवचे खातीर वीज खात्यान हे संबंदांतली निविदा जारी करून कामाक सुरवात केल्या. पूण ह्या प्रकल्पाक केंद्रीय रान खात्याची मंजुरी मेळप गरजेचें आसा. ते खातीर यत्न चल्ल्यात आनी ताका निश्चीत येस मेळटलें. इको टुरिझमाच्या माध्यमांतल्यान थंय पर्यटन खोपी निर्माण जातल्यो. तातूंतल्यान पर्यटन उदरगतीक बरे तरेन चालना मेळटली. तशेंच ह्या प्रकल्पाच्या माध्यमांतल्यान भोंवतणच्या वाठाराचीय उदरगत जातली. तातूंतल्लयान गांव स्वयंपूर्ण जावपाच्या दिश्टीकोनांतल्यान मजत जातली, अशें आमदार डॉ. देविया राणे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
