भांगरभूंय | प्रतिनिधी
उपम्हानिरिक्षक डाॅ. ए. कोन हांकां कळंगुटेच्या पबांत एके बायले कडेन गैरवर्तन करप म्हारग पडलां. तांचें पद काडून घेतलां. घडये तांची बदली जावं येता. सध्या हें प्रकरण केंद्रीय गृह मंत्रालय हाताळटा. ही बातमी येता म्हणसर आनीक एक खबर आयल्या, ती हाचे परस धक्को दिवपी. अर्थांत जांकां भितरल्यो गजाली खबर नात, तांचे खातीर. कांय दिसां पयलीं न्हावेले – सांखळे चोराक धरिल्लो. ताणें एका काॅन्स्टेबलाचें नांव घेतलां. तो खंय ताचे चोरयेंतलो वांटो घेतालो. ताचे फाटल्यान दोन आयपीएस अधिकारीय आसात, अशें चोरान सांगलें. बाणस्तारी अपघाताच्या तपासा वयल्यानूय पुलिसांचेर टिका जाता. कागाळ घेवंक उशीर केल्ल्यान एका निरिक्षकाक निलंबीत केल्लो. दुसऱ्याची बदली. चिंबला खून प्रकरणांत एका पुलिसाक दुबावा वयल्यान अटक केल्या. हाचे पयलींच जायत्यो घडणुको घडल्यांत, पूण त्यो सगलेच विसरल्यात. लोकांची स्मरणशक्त दुबळी आसता, म्हणटकूच दोन दीस बोवाळ जातलो आनी मागीर सगलें विसरायेर पडटलें अशें गुन्यांवकारांक दिसता… आनी तेंच अखेरेक खरें थारता.
फाटल्या कांय वर्सांचो इतिहास चाळ्ळ्यार गृह खात्याक बऱ्योच गजाली दिसतल्यो. ड्रग्स, लांच, विनयभंग, खंडणी, हप्ते ह्या सारक्या गुन्यांवांनी पुलीस सांपडल्यात वा तांचेर खर आरोप जाल्यात. आतांय तातूंत खंड पडूंक ना. हाचेर पुलिसांतल्या वरिश्ठांक कितें तरी उपाय काडचोच पडटलो. पूण आतां वरिश्ठांचेरूय कसो विस्वास दवरपाचो? कारण तांचेरूय आरोप जाल्यात. तांकां बडतर्फ, निलंबीत केल्यात, तांचे अधिकार काडून घेतल्यात. कांय पुलीस रातदीस प्रामाणीकपणान काम करतात, तांचेर हो अन्याय. मागीर कसलीय घडणूक घडली काय सुक्या वांगडां ओलेंय जळटा. पुलीस यंत्रणेक हो व्हगडायिल्लो विस्वास परतून मेळोवचो पडटलो.
कालूच डीजीपीन एक विधान केलां. आयपीएस अधिकारी खूब मेहनत घेतात. तांणी देशा खातीर त्याग केला. आतंकवाद, घुसखोरी, गुन्यांवां आड तांकां सदांच वेळ काळ पळयनासतना झुजचें पडटा. गजाल खरी. पूण तांचेर आरोप जाले वा तांचे व्हिडिओ व्हायरल जाल्यार कारवाय करपाक नाका? तांणी देशा खातीर त्याग केला, तांकां तीन प्रकरणां माफ, अशी भुमिका घेवप चुकीचें थारचें ना? पुलीस, सैनीक हें पद म्हानताय, त्याग, न्यायाचें प्रतीक. ताका खत लागपाक दिवंक जायना. पूण आयज बरेच सरकारी कर्मचारी, कामगार झटपट गिरेस्त जावपाक कितें करपाक मेळटलें हाचोच विचार करपाक लागल्यात. काय तांकां कोण बळयां तो (आनी कृतीय!) करपाक लायतात? हें कोणें सोदपाचें? न्हावेले धरला तो चोर जर खरें सांगता, जाल्यार तो कायद्याक किरवंटेक बांदून भागिदारीन धंदो चलयता, अशें म्हणचें पडलें ना? सगलेच पुलीस भ्रश्टाचारी असो सरसकट आरोप जाता, तेन्ना प्रामाणीक पुलिसांक कितलें वायट दिसता आसतलें? पुलिसांक जर कोणाच्या सांगण्या वयल्यान चुकीच्या मार्गार पावल दवरचें पडटा, जाल्यार तांणी तें आपल्या प्रामाणीक वरिश्ठांक सांगपाक जाय. बरोवपाक कळटा तांणी आपजिणूय बरोवं येता!! पुलिसाची नोकरी ही त्रासाची हें सगलेच जाणात. तेन्ना तांचेर टिका करतना ती पुरावे दिवन जावंक जाय. पुलिसांनीय कोणाक ही संद दिवपाक जायना. कळंगूटे जाला, तसलो प्रकार जावंक जायना. मुळांत दर्यादेगो सान्न घेवन निवळ करपाचो वेळ आयला.
दोन दिसां पयलीं लोकप्रतिनिधींचे भत्ते वाडयल्यात. लोकसेवा करतना तांकां पदरमोड करची पडटा. हो दुडू उबो कसो करचो, हाचो हुस्को तातूंतल्या कांय जाणांक आसूं येता. तेन्ना पगार, भत्ते, रिणां, इंधन हातूंत वाड करप हें जनकल्याणा खातीर गरजेचें! दरवर्सा एकमतान ही वाड जावंक जाय. सरकारी कर्मचाऱ्यांकूय हे तरेन पगारवाड मेळची. ती मेळ्ळ्यार भ्रश्टाचार, गैरकारभार दिसता तो बंद जातलो. मनीस पोट भरून जेवलो काय तृप्त जाता. धेंकर दीत पाना वयलो उठ्ठा. त्या वेळार कितलेंय रुचीक जिनस वाडले जाल्यार ताका ते खायन दिसनात. भरपूर पगार, भत्ते मेळ्ळे जाल्यार खंयचोच सरकारी कर्मचारी हात ओले करचो ना. पुलिसां पसून हो प्रयोग केल्यार बरो.
भ्रश्टाचार, गैरप्रकाराचें कोन, त्रिकोन, चौकोन…. आतां वर्तूळ पुराय जालां, अशें म्हणल्यार कोणाचो पापड मोडचो न्हय. ही कोन, वर्तुळाची भुमिती पुसट जावन एक दीस नाच्च जातली, अशी आस्त बाळगुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
