भांगरभूंय | प्रतिनिधी
वास्को, प्रतिनिधी: कुठ्ठाळे पंचायत वाठारांतल्या कोन्सुआ हांगा आयतारा सकाळीं नेटान पावस पडिल्ल्या पांच मिनटांनीच सुमार ७० ते ८० झाडां हुमटून पडिल्ल्यान भंयाचें वातावरण निर्माण जालां. कांय मातयेचीं घरांय मोडलीं. लायटूय गेल्या. कुठ्ठाळेचें आमदार आंतोनियो वास हांणी घडणुके सुवातेर वचून पळोवणी केली. तांणीय हे घडणुके विशीं अजाप उक्तायलें.
अशे तरेची घडणूक केन्नाच घडूंक नाशिल्ल्याचें थळाव्यांनी सांगलें. ह्या घडणुकांक लागून कोन्सुआ- मायणा ह्या रस्त्यावेली येरादारी कांय काळा खातीर आडकून उरली. तशेंच उजो पालोवपी दळान रस्त्यावेलीं झाडां कुशीक काडलीं.
आयतारा सकाळीं कोन्सुआ हांगा नेटान पावसा सयर वारें सुटलें. वारें सुटना फुडें एका फाटल्यान एक झाडां हुमटून पडपाक लागलीं. तशेंच मातयेच्या घरां वयलीं पांखीं, पत्रे उडून गेले. लायटीच्या सरयांचेर झाडां कोसळिल्ल्यान त्यो रस्त्यार पडल्यो. ताका लागून लायट गेली. हे विशीं आमदार वास हांणी कुठ्ठाळेची सरपंच सानिया परेरा हांचे सयत पळोवणी केली.
मातयेच्या घरांचे नळे, पांखीं गेल्यान हीं घरां कोसळपाचो भंय आशिल्लो. ताका लागून आमदार वास हांणी धांवपळ करून हांगाच्या घरांच्या पांख्यार प्लास्टीक घालें. हे विशीं उजो पालोवपी दळ, वीज खात्याक कळयल्या उपरांत ते थंय आयले. वीज खात्याच्या कामगारांनी पावसांत काम केलें. तशेंच उजो पालोवपी दळाच्या जवानांनी रोखडींच रस्त्यार आनी हेर कडेन पडिल्लीं झाडां कुशीक केलीं.
आजून कांय झाडां हुमटून पडपाची शक्यताय आसा. हे विशीं संबंदितांक सुचवण्यो केल्यात अशें आमदार वास हांणी सांगलें. सुमार एक किलोमीटर मेरेन हीं झाडां पडिल्ल्याचें कळून आयलें. मात ह्यो घडणुको घडल्यो तेन्ना रस्त्यार कोणूच नाशिल्ल्यान कोाक कांय जावंक ना, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
