कोण करता तर गुन्यांव?

भांगरभूंय | प्रतिनिधी

तर कोणूच आमकां बोटां दाखोवचो ना आनी आमकांय कोणाच्या वक्तव्यांतल्यान जाय तो अर्थ काडून राजकारण करचें पडचें ना….

गोंयांतल्या दर्यादेग वाठारांनी जावपी भोवतेक गुन्यांव भायल्यान येवपी कामगारांक लागून घडटात, अशा आशयाचें एक वक्तव्य मुख्यमंत्री प्रमोद सावंत हांणी केल्लें. गुन्यांव करतात आनी पळून वतात, तांकां मागीर सोदप कठीण जाता. देखून गोंय सरकारान भायल्या कामगारांक ‘कामगार कार्ड’ बंधनकारक केलां. तें तपासून आनी त्या मनशाची फाटभूंय जाणून घेवन तांकां काम दिवचें, अशेंय तांणी म्हणिल्लें. हें वक्तव्य थोड्यांक खटकलां. बिहारांतल्या संयुक्त जनता दलाचे फुडारी मनीषकुमार सिंह हांणी पाटणा मुख्य न्यायदंडाधिकारी न्यायालयांत मुख्यमंत्री सावंत हांचे आड कागाळ केल्या. ताचेर काल मुख्यमंत्री सावंत हांणी ‘हांवें केल्ल्या वक्तव्याक लागून कामगारांक दुख्ख जालां आसत, तर हांव खेद उक्तायतां. गोंयान सदांच भायल्या कामगारांचो आदर केला.’ अशी प्रतिक्रिया दिल्या. गोंया भायर ह्या वक्तव्याक अजून राजकी मोडण दिवपाचो यत्न चल्ला. आतां खेद उक्तायिल्ल्यान हो वाद न्हिवता काय कोण फूंक मारून तो परतून पेटयता तें पळोवपाचें.
मुख्यमंत्री उलयले तें खरें कांय फट हें सद्दां दिसाळीं वाचप्यांक आमी सांगपाची गरज ना. गोंयांत गुन्यांव वाडल्यात. खास करून दर्यादेग वाठारांनी. तातूंत सांपडटा ते चडशे भायलेच. अर्थांत गोंयकारूय फाटीं नात. गुन्यांवकारांक जात, धर्म, पिराय, प्रांताचें वक्ल लावन पळोवपाचें नासता. गुन्यांवकार तो निमणो गुन्यांवकार! तरीय, पुलिसांनी गुन्यांवकारांची नांवां सयत आंकडेवारी जाहीर केल्यार, ‘दुध का दुध, पानी का पानी’ जातलें. दर्यावेळांचेर घुंवळे वखदां विकपी, सोरो पियेवन मारामारी करपी, मोबायल चोरप्यांचीं नांवां वाचल्यार कोण खंयचो तें सगल्यांक कळटा. ताचेर इतल्या बोवाळाची गरज नाशिल्ली. राजकी फुडाऱ्यांचेर लोक सरसकट भ्रश्टाचार, गैरकारभाराचे आरोप करतात, तशेंच कांयशें हें. आदल्या तेंपार गोंयांत खून जायनाशिल्ले. कुमार हो खुनाच्या आरोपा खाला गोंयांत गोळार दिल्लो पयलो आरोपी. 1980 च्या दशकांत परिस्थिती बदलूंक लागली. त्या काळार कोंकण रेल्वे गोंयांत येवपाची आशिल्ली. तिच्या विरोधांत व्हडलें आंदोलन जालें. मार्ग बदल जालो. रेल्वे धांवपाक लागतकच गुन्यांवकार गोंयांत येतले आनी पळून वतले, भायले लोक येतले आनी ते हांगा स्थायीक जातले. साधनसुविधांचेर वजें पडटलें, अशीं जायतीं मतां व्यक्त जाल्लीं. कसलेय गजालीचे फायदे आसतात, तशें लुकसाणूय आसता. कोंकण रेल्वेन गोंयचे उदरगतीक व्हड योगदान दिलां हें कोणूच न्हयकारचो ना. पूण, तिचे वरवींच पाड्या मनशांची आयात- निर्गतूय जाल्या, हें न्हयकारुंक जावचें ना. खुद्द रेल्वे पुलिसांनीच कितल्याशाच गुन्यांवकारांक पळून वतना रेल्वे स्टेशनांचेर धरल्यात.
दक्षीण भारतीय आनी हालींच्या वर्सांनी उत्तर भारतीयां आड मुंबय आंदोलनां जाल्यांत तशीं गोंयांत जावंक नात. भायल्या कामगारांचो गोंयकारांनी सदांच आदर केला. आज पसून कोणूय कामगार आयलो काय गांवचे ल्हान- व्हड लोकप्रतिनिधी तांकां वीज- उदक कनेक्शन, रेशनकार्ड आनी हेर दाखले दिवपाक आपूण जावन धांवून वतात. तांकां खोपी बांदपाक जमनीं, भाड्यान रावपाक घरां दिवपी आमी गोंयकारुच. ह्या कामगारांनीय गोंयची सेवा केल्या. पयले ते चवथे श्रेणीच्या कामगारांनी फक्त सात दीस काम बंद केलें, जाल्यार गोंयच्यो भोयोभोयो जातल्यो. कारण कोयर, सिवरेज, बांदकामां, रस्ते खणप, ड्रायव्हर, भाजी- फळां वेपार, केंस कापप, फर्निचर, टायल्स घालप, गवंडेंपण असलीं जायतीं कुशळटायेचीं कामां लागीं लागीं पुरायपणान तांच्या हातांत गेल्यांत. कांय राजकी पक्षांक, संघटनांक हें आवडना आनी ते तांकां नांवा दवरतात. पूण बिल्डर, वेवसायिक, शेतकार, बागायतदार तांचो आदर करतात. कारण तांचे बगर हांचीं कामां जायनात. गुन्यांव करप्यां मदीं भायले चड आसात, अशें म्हणलेंय तरी प्रामाणीकपणान काम करपी भायल्यान तें मनाक लावन घेवंक जायना. सुक्यां वांगडा ओलेंय जळटलेंच…. आनी आमकां भारतीयांक देशांत खंयूय वचून रावपाचो, काम करपाचो संविधानीक अधिकार आसा. फक्त आमी जंय वतात, त्या राज्याची भाशा, संस्कृतायेंत मिसळून वचपाक जाय, थंय प्रामाणीकपणान वागपाक जाय, चुकीचे वेवसाय करपाक फावना, सोरो पियेवन रातच्या वेळार किर्लोस करुंक जायना. आमी इतलेंच मतींत धरलें तर कोणूच आमकां बोटां दाखोवचो ना आनी आमकांय कोणाच्या वक्तव्यांतल्यान जाय तो अर्थ काडून राजकारण करचें पडचें ना…. आनीक एक, केंद्र – राज्य सरकारांनी राज्यां इतलीं विकसीत करचीं की हेर राज्यांच न्हय, तर देशा भायल्या लोकांक पसून थंय वच्चेंशें दिसचें.