कोणेय मोरजे, शापोरा येवचें आनी जाय तितल्यो शिणाण्यो व्हरच्यो, पूण…….

भांगरभूंय | प्रतिनिधी

पेडणें: वट्ट पंदरा वर्सांच्या काळा उपरांत तेंबवाडो मोरजे -शापोरा न्हंयेंत व्हडा प्रमाणांत अंदूं शिणाण्यो जाल्यात. त्यो तेमवाडो मोरजे वाठारांतले थळावे लोक परंपरीक तरेन दर्यादेगेवेल्यान धा- पंदरा मिटर उदकांत पेंवन वचून काडटात. मात शिवोले वाठारांतले कांय वेवसायीक व्हडें येवन येतात आनी शिणाण्यो कापपाचें काम सुरू करतात. जंय व्हड फातरांक शिणाण्यो पडल्यात ते फातरूच घेवन हे व्हंडेकार वतात. ह्या सगल्या बेकायदेशीर प्रकाराचो आमी विरोध करतात. हाका लागून सरकारान हाचेर योग्य ती दखल घेवची. परंपरीक तरेन दर्यादेगेर येवन जंय शिणाण्यो आसात थंय पेवन वचून त्यो व्हेल्यार आमची कसलीच हरकत ना. अशी सुचवणी थळाव्या वेवसायिकांनी केल्या.
मजगतीं, ९ तारखेर तेंबवाडो शापोरा न्हंयेचे देगेर शिवोलेचे कांय वेवसायीक शिणाण्यो व्हरपा खातीर व्हडें घेवन आयिल्लें. तांकां आडावन थळाव्या वेवसायिकांनी शांतपणान तांची समजूत काडली.
ह्या वेळार मोरजेचे सरपंच पवन मोरजे घडणुके सुवातेर दाखल जाले. तांणीय दोनूय गटां कडेन चर्चा करून जे तरेन थळावे परंपरीक पद्धतीन शिणाण्यो काडटात, तेच तरेन शिवोले तशेंच हेर वाठारांतल्या लोकांनी काडपाक हरकत ना. मात आमकां मेळिल्ले म्हायती प्रमाण, शिवोले वाठारांतले कांय वेवसायीक व्हडीं घेवन येवन शापोरा न्हंयेंत ज्या खडपांक शिणाण्यो लागल्यात तीं खडपांच घेवन वतात. हाका लागून फुडाराक ह्या शिणाण्यांचें बीं नश्ट जावपाची शक्यताय थळाव्यांनी उक्तायल्या.
हांगां व्हडीं घेवन शिणाण्यो कापडाक येवचें न्हय. परंपरीक तरेन ते सुवातेर पेंवत वचून गोंयकारांनी शिणाण्यो जाय तितल्यो व्हरच्यो. कितल्योय शिणाण्यो व्हेल्यो म्हणून आमची हरकत ना, अशी म्हायती सरपंच पवन मोरजे हांणी दिली. तशेंच आपूण दोनूय गटां कडेन उलोवन हो विशय समजिकायेन सोडयतलों असो विस्वास तांणी ह्या वेळार उक्तायलो.

व्हड्या वरवीं शिणाण्यो काडपाक खर विरोध
शिवोले वाठारांतल्या नागरिकांनी व्हडीं घेवन शिणाण्यो व्हरपाक आनी शिणाण्यांचीं खडपां व्हरपाक आमचो विरोध आसा. तांणी पेवन येवन आनी जितल्यो शिणाण्यो व्हरपाच्यो आसा तितल्यो व्हरच्यो. हे गजालीक आमचो विरोध ना असो दावो वेवसायिकांनी ह्या वेळार केला.