कोणाच्यो म्हशी कोणाक उठाबशी

भांगरभूंय | प्रतिनिधी

दुसऱ्याचे 2,214 कोटी वसूल करपाक ल्हान लोकेंचर चेपण

• अमीत पाटकारः विधानसभेचो सप्तकी नियाळ परिशदेंत आरोप

पणजीः वेवसायीक, उद्देगीक आनी सरकारी मळाचेर मार्च 2024 मेरेन वीज खात्याची 2,214 कोटी लायटीचीं बिलां थकल्यांत, अशी म्हायती वीज मंत्र्यान विधानसभेंत लेखी जापेंत दिल्या. ते पयशे वसूल करचें सोडून सरकार ल्हान गोंयकांराचेर चेपण घालता, असो आरोप गोंय कोंग्रेस प्रदेशाध्यक्ष अमीत पाटकार हांणी केला.

काँग्रेसीन विधानसभेचो सप्तकी नियाळ पत्रकार परिशदेंत मांडलो. पत्रकार परिशदेंत पाटकार उलयताले. गोंय काँग्रेस मिडीया चेअरमन अमरनाथ पणजीकार, उत्तर गोंय काँग्रेस अध्यक्ष विरेंद्र शिरोडकार आनी दक्षीण गोंय काँग्रेस अध्यक्ष सावियो डिसिल्वा हजर आसले.

जो प्रस्ताव वीज खात्यान जेईआरसीक दिल्लो तातूंत सांगिल्लें, 2022- 23 त 415 कोटी रुपयांचो उणाव भरून काडपा खातीर आमी अंदूं वीज बिलांत वाड करतात. पूण वीज खात्यान दिल्ले म्हायती प्रमाण वेवसायीक 480 कोटी, उद्देगीक 831 कोटी आनी सरकारी उपभोगत्यां कडल्यान 902 कोटी रुपया थकल्यात. जाची वट्ट रक्कम 2,214 कोटी रुपया जाता, पूण सरकार हे पयशे वसूल करचे सोडून बिलां वाडोवन ल्हान मनश्यांचेर चेपण घालपाचो यत्न करता. आपल्या वेवसायीक इश्टांच्या हिता खातीर वीज बिलांत वाड केल्या. गोंयात खूबशे व्हिला घरगुती वीज मिटर लावन भाड्याक दितात. तांकां वेवसायीक मिटर बसोवन तांचे कडल्यान हो उणाव भरून घेयात, गोंयकारां कडल्यान न्हय, अशें पाटकार हांणी सांगलें.

जो एसटीच्या विशया वयल्यान सत्ताधारी भाजपान बोवाळ घातला हाचे वयल्यान एसटी समाजा खातीर भाजपाची भुमिका कितें आसा ती स्पश्ट दिसून येता. सत्ताधारी पक्षान विधानसभेंत बोवाळ घालून ती बरखास्त करप हे इतिहासांत पयलेच फावट घडला आनी ही दुख्खाची गजाल, अशें पाटकार हांणी म्हणलें.

प्रस्न- जापेच्या वरांत राष्ट्रीय शिक्षण धोरण आनी दाबोळी विमानतळाचे प्रस्न येवपाचे आसले. हे घडणुकेच्या दोन दिसां उपरांत एअर अरेबिया विमान दाबोळे वयल्यान मोपा गेले. ज्यो जापो सरकारान दिल्यात, त्या जापेंनी सरकार उक्तें पडपाचें आसलें. ते खातीर बोवाळ घालून प्रस्न- जापेचें वर तांणी बरखास्त केलें आनी शुन्य वराक सगळे शांत आसले, असो आरोप पाटकार हांणी केलो.

विरोधांत आसतना पर्यटन मंत्री रोहन खंवटे दृश्टी, कोयर एकठांय करपाच्या कंत्राटांत घोटाळो आसा म्हूण बोवाळ मारतालो. आतां तो वॉशींग मशिनांतल्यान नितळ जावन आयला. जेन्ना विरोधी पक्ष फुडारी स्कॅम म्हूण आवाज काडटात तेन्ना मंत्री ओग्गी आसता, असोय आरोप युरी हांणी केला. थळाव्या टॅक्सीकारांक लागून 500 कोटी रुपयांचो महसूल बुडला आनी 8 कोटीचो महसूल गोवा मायल्सान जोडून दिला. पूण कायद्या प्रमाण जीएसटी भरतलो जाल्यार वर्सुकी येणावळ 40 लाख आसपाक जाय. तशेंच हे टॅक्सीकार आपले गाडयेंत पॅट्रोल भरतात आनी वेळावेळार ती दुरूस्त करतात. ह्या करांतल्यान सरकाराक महसूल मेळना काय किते, असोय प्रस्न पाटकार हांणी विचारलो. हायवे परस चड अंतराचेर मोपा विमानतळ बांदून नवीन लींक रोडांत घोटाळो केला. हायवे परस चड अंतराचेर हो विमानतळ बांदपाकूच जाय आसलो जाल्यार विमानतळाच्या खर्चांतूच लींक रोडाचें काम हातांत घेवपाक जाय आसलें. वेगळें कंत्राट काडून ताचेर 350 कोटी रुपया मोडून व्हडलो घोटाळो केला, असोय आरोप पाटकार हांणी केलो.

परंपरीक चिखल काल्याचो केलो ‘इव्हेंट’

प्रियोळा चिखल कालो परंपरीक पद्दतीन मनयतात आनी लोकांची ह्या उत्सवा कडेन भावनीक संबंद आसा. इतलीं वर्सां चलत आयल्ले परंपरेंत पर्यटनाचो ‘इव्हेंट’ करून ह्या उत्सवाचें पावित्र्य भंग केलां, असो आरोप अमीत पाटकार हांणी केलो.